Ադրբեջանի նախագահ Իլհամ Ալիևը հայտնել է, որ Ադրբեջանը փաստաթղթեր է պատրաստում՝ Ակտաուում AZAL-ի ինքնաթիռի կործանման կապակցությամբ Ռուսաստանի դեմ միջազգային դատական ատյաններ հայցեր ներկայացնելու համար, հայտնում է Minval-ը։

Ըստ Ալիևի, «AZAL-ի ինքնաթիռի շուրջ տեղի ունեցած միջադեպի իրավիճակը պարզ է ցերեկվա նման»։

Նա հայտարարել է, որ յոթ ամսվա ընթացքում Ադրբեջանը ռուսաստանյան կողմից որևէ հստակ պատասխան չի ստացել։

Ադրբեջանի գլխավոր դատախազը հարցումներ է ուղարկում Ռուսաստանի քննչական կոմիտեի ղեկավարին, սակայն ի պատասխան գալիս է միայն «քննությունը շարունակվում է» ձևակերպումը, պատմել է Ալիևը։

Ըստ նրա, նման դիրքորոշումը «ոչ կառուցողական» է։

Նա հաստատել է, որ Ադրբեջանը մտադիր է փաստաթղթերը ներկայացնել միջազգային դատական ատյաններ։

Ալիևը հիշատակել է մալայզիական «Բոինգի» աղետի հետաքննությունը, որը տևել է ավելի քան 10 տարի։

Ըստ նրա, Ադրբեջանը «նույնպես պատրաստ է սպասել այնքան, որքան կպահանջվի»։

Մեկնաբանելով AZAL-ի ինքնաթիռի միջադեպը՝ Ալիևը հայտարարել է, որ Ադրբեջանին հայտնի է, թե ինչ է տեղի ունեցել, և որ ռուսաստանյան պաշտոնյաները նույնպես տեղյակ են եղել պատահածի մասին։

Ըստ նրա, հարց է առաջանում. «Ինչո՞ւ նրանք չեն անում այն, ինչ նման իրավիճակում կաներ ցանկացած հարևան»։

Ալիևը հավելել է, որ Ադրբեջանը «պահանջում է մեղքի ճանաչում, ինքնաթիռը խոցողների պատիժ, տուժածների ընտանիքներին փոխհատուցման վճարում և AZAL-ին օդանավի կորստի համար վնասի հատուցում»։