Իսրայելում փողոցում հարձակում են գործել Քնեսեթի արաբ պատգամավոր Այման Օդեհի վրա, հայտնում է Times of Israel-ը։

Ընդդիմության առաջնորդ Յաիր Լապիդը և Դեմոկրատական կուսակցության նախագահ Յաիր Գոլանը դատապարտել են տեղի ունեցածը։

«Ես դատապարտում եմ Քնեսեթի պատգամավոր Օդեհի նկատմամբ բռնությունը և ոստիկանությանը կոչ եմ անում գտնել մեղավորներին ու պատասխանատվության ենթարկել նրանց։ Ժողովրդավարական պետությունում քաղաքական բռնության տեղ չկա», - գրել է Լապիդը X սոցցանցում։

Գոլանն իր հերթին պնդում է, որ միջադեպը «երկարատև քաղաքական սադրանքի ուղղակի հետևանք է»՝ վկայակոչելով Գազայի պատերազմի մասին իր արտահայտությունների համար Օդեհին հեռացնելու կոալիցիայի վերջին անհաջող փորձը։

«Նրանք, ովքեր Քնեսեթում քվեարկում են արաբ պետական պաշտոնյային իր հայացքների համար պաշտոնանկ անելու օգտին, չեն կարող ցնցվել, երբ խռովարարները փողոցում հարձակվում են նրանց վրա», - գրել է Գոլանը X սոցցանցում՝ միջադեպն անվանելով «հարձակում Իսրայելի ողջ արաբական փոքրամասնության վրա»։

Ցուցարարները նաև շրջապատել են «Հադաշ-Թաալ» կուսակցության պատգամավոր Օֆիր Կասիֆին, որը հետագայում կառավարությանը մեղադրել է քաղաքական բռնությանն աջակցելու մեջ, և գոռացել են նրա վրա։

«Որպեսզի պարզ լինի՝ կառավարությունը լեգիտիմացնում և նույնիսկ խրախուսում է բռնությունն ու իր ընդդիմախոսների սպանությունները», - գրել է նա X սոցցանցում։