Բունդեսթագը մշտապես ենթարկվում է կիբերհարձակումների և հաքերներից ավելի լավ պաշտպանության կարիք ունի, dpa գործակալությանը տված հարցազրույցում հայտարարել է Գերմանիայի խորհրդարանի նախագահ Յուլիա Կլյոկները։

«Մենք բազմաթիվ հաքերային հարձակումներ ենք արձանագրում. Բունդեսթագը հանրաճանաչ թիրախ է», - նրա խոսքն է մեջբերում գործակալությունը։

Ըստ նրա, խորհրդարանը պետք է մեծացնի հաքերների գործողություններին հակազդելու իր կարողությունները։

Հունիսի սկզբին Գերմանիայի ներքին գործերի նախարար Ալեքսանդր Դոբրինդտը և Քրեական գործերով դաշնային գերատեսչության ղեկավար Հոլգեր Մյունխը հայտարարել էին, որ 2024 թվականին Գերմանիայում գրանցվել է 131 391 կիբերհանցագործություն, ինչը 2,2 տոկոսով պակաս է նախորդ տարվա համեմատ։

Նաև գերմանացի իրավապահները գրանցել են կիբերհանցագործների 201 877 գործողություն, որոնք Գերմանիայի վրա հարձակվել են արտերկրից կամ անհայտ վայրից, ինչը 6 տոկոսով ավելի է, քան 2023-ին։

Միևնույն ժամանակ, 30,7 տոկոսով աճել է, այսպես կոչված, DDoS-հարձակումների թիվը, որոնց դեպքում ցանցերի դիտավորյալ գերբեռնվածության միջոցով արգելափակվում է պետական մարմինների և այլ կազմակերպությունների աշխատանքը։ Նման հանցագործությունների հատկապես մեծ թիվ Գերմանիայում արձանագրվել է Ռուսաստանից, գրում է Deutsche Welle-ն։