Մեծ Բրիտանիայում գործարկվել է անօրինական միգրացիայի կազմակերպիչների դեմ աշխարհում առաջին պատժամիջոցների ռեժիմը։ Այս մասին հայտնել է Reuters գործակալությունը՝ հղում անելով Միացյալ Թագավորության արտաքին գործերի նախարարությանը։

«Շատ երկար ժամանակ հանցավոր խմբավորումները լցրել են իրենց կեղտոտ գրպանները և անպատիժ կերպով խաղացել են խոցելի մարդկանց զգացմունքների վրա՝ Մեծ Բրիտանիայում զբաղվելով անօրինական միգրացիայով», - ասել է Արտաքին գործերի նախարարության ղեկավար Դեյվիդ Լեմին։ - «Ահա թե ինչու է Միացյալ Թագավորությունը մշակել աշխարհում առաջին պատժամիջոցային ռեժիմը, որն ուղղված է մարդկանց մաքսանենգությամբ և անօրինական միգրացիայի կազմակերպմամբ զբաղվող խմբավորումների, ինչպես նաև նրանց օգնողների դեմ»։

Նշվում է, որ բրիտանական կառավարությունը կկարողանա սառեցնել սև ցուցակում ընդգրկված անձանց հաշիվները և արգելել նրանց մուտքը երկրի տարածք։ Միջոցները նախևառաջ ուղղված կլինեն այն անձանց դեմ, ովքեր զբաղվում են կեղծ փաստաթղթերի ձևակերպմամբ, անօրինական միգրացիոն երթուղիների կազմակերպիչներին ֆինանսական ծառայություններ մատուցելով և Լա Մանշի նեղուցում օգտագործվող փոքր նավակների մատակարարմամբ։ Դեյվիդ Լեմին նոր պատժամիջոցային ռեժիմի մշակման մասին առաջին անգամ հայտնել է հունվարին։

Մեծ Բրիտանիայում անօրինական ներգաղթի խնդիրը սրվել է երկրի Եվրամիությունից դուրս գալուց հետո, թեև հենց այս թեման էր Brexit-ի գլխավոր պատճառներից մեկը։ 2018 թվականից ի վեր Լա Մանշի նեղուցով Միացյալ Թագավորություն է տեղափոխվել ավելի քան 150 հազար անօրինական ներգաղթյալ։ Աշխատանքային կուսակցության կողմից անցյալ տարվա հուլիսին կայացած խորհրդարանական ընտրություններից հետո ձևավորված կառավարությունը խոստացել է ուժեղացնել համագործակցությունը ԵՄ երկրների հետ՝ թագավորություն անօրինական միգրանտների մուտքը կանխելու համար։