Ստամբուլում կայացած IDEF 2025 սպառազինության միջազգային ցուցահանդեսում Թուրքիան ներկայացրել է իր առաջին գերձայնային հրթիռը՝ Tayfun Block-4-ը, որն ըստ մի շարք բնութագրերի գերազանցում է ռուսական «Կինժալ»-ին։ Այս մասին հայտնում է Anadolu-ն։

Բալիստիկ Tayfun Block-4 հրթիռը «Tayfun» հրթիռի գերձայնային տարբերակն է, որը Թուրքիայի ազգային արտադրության ամենահեռահար բալիստիկ հրթիռն է։

Tayfun-ի նոր տարբերակը կշռում է ավելի քան 7 տոննա։ Ըստ մշակողների՝ բազմաֆունկցիոնալ մարտագլխիկով հրթիռը կկարողանա մինչև 3000 կիլոմետր հեռավորության վրա ոչնչացնել հակաօդային պաշտպանության համակարգերը, կառավարման կետերը, ռազմական անգարները և կրիտիկական կարևորության ռազմական օբյեկտները։ Հայտնի է նաև, որ հրթիռը թիրախները խոցում է բարձր ճշգրտությամբ. շեղումը չի գերազանցում 5 մետրը, իսկ դրա արագությունը հասնում է ավելի քան 6000 կմ/ժ-ի։ Դրա երկարությունը մոտ 10 մետր է, իսկ տրամագիծը՝ 938 մմ։

Թուրքական Roketsan ընկերությունը Ստամբուլի IDEF 2025 միջազգային սպառազինության ցուցահանդեսում ներկայացրել է մի քանի նորագույն համակարգեր, որոնց թվում են՝ Atmaca հրթիռը, Gökbora դասի «օդ-օդ» հրթիռը և 300 Er օդային հենակայանից արձակվող բալիստիկ հրթիռը։