ԱՄՆ-ի, Ուկրաինայի և որոշ եվրոպական երկրների ներկայացուցիչները այս շաբաթավերջին կհանդիպեն Մեծ Բրիտանիայում՝ ԱՄՆ-ի և Ռուսաստանի առաջնորդներ Դոնալդ Թրամփի և Վլադիմիր Պուտինի միջև գագաթնաժողովից առաջ դիրքորոշում համաձայնեցնելու համար: Դրա մասին ուրբաթ օրը հայտնել է Axios պորտալը՝ հղում անելով աղբյուրներին:

Նշվում է, որ «Ուկրաինան և ՆԱՏՕ-ի որոշ դաշնակիցներ մասնավոր կերպով մտահոգություն են հայտնել, որ Թրամփը կարող է համաձայնվել հակամարտությանը վերջ դնելու Պուտինի առաջարկին՝ առանց հաշվի առնելու իրենց դիրքորոշումները»: Axios-ը պարզաբանում է, որ հանդիպում անցկացնելու գաղափարը, որի ժամանակ կողմերը «կփորձեն մշակել ընդհանուր դիրքորոշում», առաջացել է ուրբաթ ուկրաինացի, ամերիկացի և եվրոպացի պաշտոնյաների միջև զրույցի ժամանակ:

Պորտալը շեշտում է, որ հանդիպման մանրամասները և մասնակիցների կազմը դեռևս համաձայնեցվում են: Միևնույն ժամանակ, Axios-ի աղբյուրը կարծում է, որ Ուկրաինայի կողմից հնարավոր տարածքային զիջումները կպահանջեն, որ Վլադիմիր Զելենսկին երկրում հանրաքվե անցկացնի:

Ավելի վաղ Թրամփը հայտարարել էր, որ ակնկալում է հանդիպել իր ռուս գործընկերոջ հետ Ալյասկայում օգոստոսի 15-ին։ Ամերիկացի նախագահը համապատասխան հայտարարությունը հրապարակել է Truth Social-ում։ Ռուսաստանի առաջնորդի օգնական Յուրի Ուշակովը հաստատել է գագաթնաժողովի ժամանակն ու վայրը։ Դա կլինի 2025 թվականի հունվարին Սպիտակ տուն Թրամփի վերադարձից ի վեր Ռուսաստանի և ԱՄՆ առաջնորդների առաջին անձնական հանդիպումը։