Նախընտրելի
ԱՄՆ Յուտա նահանգի նահանգապետ Սփենսեր Քոքսը կիրակի օրը հայտարարել է, որ հրաձգության գործով կասկածյալը, որի հետևանքով զոհվել է պահպանողական կուսակցության ակտիվիստ Չարլի Քըրքը, չի համագործակցում իշխանությունների հետ։
«Նա չի խոստովանել իր արածը։ Նա չի համագործակցում, բայց նրա շրջապատի մարդիկ համագործակցում են։ Եվ ես կարծում եմ, որ դա շատ կարևոր է», – ասել է Քոքսը ABC News-ին տված հարցազրույցում։
Իշխանությունները հրաձգության ենթադրյալ կատարողին նույնականացրել են որպես 22-ամյա Թայլեր Ռոբինսոն, որը ներկայումս գտնվում է կալանքի տակ։ Ըստ Քոքսի, մեղադրանքը պաշտոնապես կներկայացվի երեքշաբթի օրը։
Քոքսը նաև հաստատել է New York Times-ի կիրակնօրյա հրապարակումը, ըստ որի՝ ենթադրյալ կրակողը հրաձգությունից հետո շփվել է այլ անձանց հետ Discord հարթակում։ The Times-ը հայտնել է, որ Ռոբինսոնը կատակել է, թե ինքն է ենթադրյալ կրակողը։
«Մեր հաստատածը այն է, որ այդ խոսակցությունները իսկապես տեղի են ունեցել, և մարդիկ չեն հավատացել, որ դա իրականում նա էր։ Ամեն ինչ կատակ էր մինչև, մինչև նա, գիտեք, մինչև նա չխոստովանեց, որ դա իրոք ինքն էր», – ասել է Քոքսը։
Նահանգապետը, որը մասնակցել է հետաքննությանը, նաև հաստատել է շաբաթ օրը տարածված տեղեկությունը, ըստ որի՝ կասկածյալի սենյակակիցը տրանսգենդեր է։
«Մենք կարող ենք հաստատել, որ նրա սենյակակիցը իսկապես եղել է նրա բոյֆրենդը, որը փոխում է սեռը՝ տղամարդուց կնոջ։ Դա այն տեղեկատվությունն է, որը ուներ ՀԴԲ-ն և որի մասին խոսվել էր երեկ։ Մենք նույնպես կարող ենք դա հաստատել։ Եվ նա համագործակցում է իշխանությունների հետ», – ասել է Քոքսը։
Այնուամենայնիվ, պաշտոնյաները դեռ չեն պարզել սպանության շարժառիթը։
