Ինքնաթիռների ուղևորները կրկին բախվել են խափանումների՝ մի շարք եվրոպական օդանավակայաններում, այդ թվում՝ Հիթրոուում, որտեղ գրանցման և ուղեբեռի համակարգը դուրս է եկել շարքից կիբերհարձակման հետևանքով, հայտնում է BBC News-ը։

Շաբաթ օրը արձանագրվել են հարյուրավոր ուշացումներ՝ մի քանի ավիաընկերությունների կողմից օգտագործվող ծրագրային ապահովման խափանման պատճառով, ինչի հետևանքով օդանավակայանները ուղևորների նստեցումն իրականացրել են ձեռագիր եղանակով։ Բրյուսելի օդանավակայանը հայտնել է, որ «առայժմ չկա որևէ հստակություն»՝ երբ համակարգը կվերականգնվի, և կոչ է արել ավիաընկերություններին չեղարկել մեկնող չվերթների կեսը։

RTX ընկերությունը, որը Collins Aerospace ծրագրային ապահովման մատակարարի մայր ընկերությունն է, հայտարարել է, որ «տեղյակ է որոշ օդանավակայաններում իր համակարգերի խափանումների մասին», որոնք կապված են կիբերհարձակումների հետ, և հույս ունի հնարավորինս արագ լուծել խնդիրը։

Ընկերությունը դեռևս չի բացահայտել, թե ինչն է սխալ ընթացել և որքան ժամանակ կարող է տևել խափանումը։

Կիրակի օրը Հիթրոուի օդանավակայանը հայտնել է, որ խնդրի լուծման աշխատանքները շարունակվում են։ Օդանավակայանը ներողություն է խնդրել ուշացումների բախված ուղևորներից, սակայն ընդգծել է, որ «թռիչքների ճնշող մեծամասնությունը շարունակում է իրականացվել» և հորդորել է ուղևորներին նախապես ստուգել իրենց չվերթի կարգավիճակը և ժամանակին հասնել օդանավակայան։