Էստոնիան իր քաղաքացիների համար ժամանակավորապես փակել է այն ճանապարհը, որից նրանք սովորաբար օգտվում են, և որն անցնում է Ռուսաստանի տարածքով, այն բանից հետո, երբ ներքին գործերի նախարարը հայտնել է այնտեղ կանգնած ռուսաստանցի զինվորների խմբի մասին, կիրակի օրը հայտնել է Էստոնիայի հանրային հեռարձակողը:

Ինչպես հաղորդում է Associated Press-ը, Էստոնիայի ոստիկանության և սահմանապահ ծառայության վարչությունը ուրբաթ օրը իր հայտարարության մեջ նշել է, որ ճանապարհի փակումը տեղի է ունեցել «այն բանից հետո, երբ սահմանապահները նկատել են սովորականից ավելի մեծ ստորաբաժանում, որը շարժվում էր Ռուսաստանի Դաշնության տարածքով»։

Էստոնիայի սահմանապահ գերատեսչությունը հայտարարել է, որ Սաատսե անցակետի փակումն անհրաժեշտ է Էստոնիայի բնակիչների անվտանգությունն ապահովելու և հնարավոր միջադեպերը կանխելու համար։ Սաատսե անցակետը Էստոնիայի հարավ-արևելքում ռուսաստանյան տարածքի փոքր հատված է, որն ունի ճտքավոր կոշիկի ձև և ձգվում է դեպի Էստոնիայի տարածք։

Էստոնացիներն ու այլ քաղաքացիներ կարող են անցնել այդ տարածքով առանց թույլտվության, բայց նրանց արգելվում է կանգ առնել։ Էստոնական ԶԼՄ-ները հայտնել են, որ ռուսաստանյան ստորաբաժանումը բաղկացած է եղել մոտ 10 մարդուց։ Թեև Ռուսաստանի սահմանապահները սովորաբար պարեկում են այդ տարածքում, սակայն նրանց համար անսովոր է կանգնել ճանապարհի մեջտեղում, որով, ըստ ԶԼՄ-ների հաղորդումների, օգտվում են նաև էստոնացիները։

Շաբաթ օրը ներքին գործերի նախարար Իգոր Տարոն հայտարարել է, որ ռուսաստանցի զինվորները կրկին լքել են այդ տարածքը։ Նա հավելել է, որ իրավիճակը հանգիստ է, բայց ճանապարհը փակ կմնա առնվազն մինչև երեքշաբթի։

«Պատերազմի ուղղակի սպառնալիք չկա։ Դա մշտապես հաստատում են Էստոնիայի պաշտպանության ուժերը։ Սաատսեում տեղի ունեցած միջադեպը չի փոխել իրավիճակը», - նրա խոսքն է մեջբերում Postimees օրաթերթը։

Էստոնիան մարտական պատրաստության է բերվել այն բանից հետո, երբ անցյալ ամիս ռուսաստանյան երեք կործանիչներ առանց թույլտվության ներխուժեցին նրա օդային տարածք և մնացին այնտեղ 12 րոպե։ Մեկ շաբաթ առաջ անօդաչու թռչող սարքերը խախտել էին Լեհաստանի օդային տարածքը, ինչը ՆԱՏՕ-ի անդամի մասնակցությամբ ամենալուրջ անդրսահմանային միջադեպն էր Ուկրաինայում պատերազմի սկզբից ի վեր։

ՆԱՏՕ-ի այլ երկրներ, որոնք գտնվում են դաշինքի արևելյան թևում, հայտնել են իրենց տարածքում նմանատիպ ներխուժումների և անօդաչու թռչող սարքերի անկումների մասին։