Նախընտրելի
Ուկրաինան և Եվրամիությունը այսօր՝ հոկտեմբերի 14-ին, որոշել են չեղարկել որոշ սակագներ և բարձրացնել ԵՄ ուկրաինական գյուղատնտեսական արտահանման քվոտաները, հաղորդում է РБК-Украина-ն՝ հղում անելով եվրոպական և եվրաատլանտյան ինտեգրման հարցերով փոխվարչապետ Տարաս Կաչկայի ֆեյսբուքյան գրառմանը։
Ասոցացման կոմիտեի որոշումը առևտրային ձևաչափով ուժի մեջ կմտնի 15 օրից (հոկտեմբերի 29-ին)։ Այն ընդունվել է, երբ Եվրամիության խորհուրդը նախօրեին ընդունել է Ուկրաինայի հետ նոր առևտրային համաձայնագրի պայմանները։
«Ուկրաինացի արտահանողները կկարողանան օգտվել նոր առևտրային ռեժիմից արդեն այս տարի։ Որոշումը երկկողմանի է և ուժի մեջ է անորոշ ժամանակով»,- նշել է Կաչկան։
Ըստ նրա՝ եվրոպական շուկա մուտք գործելու հնարավորությունների ավելացման հաջորդ վերանայումը տեղի կունենա 2028 թվականին։
ԵՄ խորհուրդը ավելի վաղ որոշել էր կրճատել կամ վերացնել մի շարք ուկրաինական գյուղատնտեսական ապրանքների մաքսատուրքերը։ Դրանք ներառում են կաթնամթերք, թարմ մրգեր և բանջարեղեն, միս և մսամթերք։
Սակայն, ամենազգայուն ապրանքների՝ շաքարի, թռչնամսի, ձվի, ցորենի, եգիպտացորենի և մեղրի համար՝ եվրոպական շուկա մուտք գործելը կմնա սահմանափակ և աստիճանական։
Ուկրաինայի և ԵՄ-ի միջև Ասոցացման համաձայնագիրը ստորագրվել է 2014 թվականին և լիովին գործում է 2017 թվականից։ Դրա տնտեսական բաղադրիչը՝ Խոր և համապարփակ ազատ առևտրի համաձայնագիրը, նախատեսում է Ուկրաինայի տնտեսության արդիականացում և Եվրոպայի հետ առևտրի ընդլայնում։
Ռուսական լայնածավալ ներխուժումից հետո Եվրամիությունը Ուկրաինայի համար ժամանակավոր առևտրային զիջումներ մտցրեց, որոնք ուժի մեջ էին մինչև 2025 թվականի հունիսի 6-ը։
