նախընտրելի դարձնել
Պետդումայի պատգամավոր Օլեգ Մատվեյչյովը Ռուսաստանի ժողովրդագրական ճգնաժամի արմատական լուծում է առաջարկել: Հասարակական պալատում աբորտների հարկադրանքն արգելող օրինագծի քննարկման ժամանակ պատգամավորը նշել է, որ ծնելիության մակարդակը բարձրացնելու համար անհրաժեշտ է իջեցնել բնակության կենսամակարդակը:
«Մենք պետք է մեկընդմիշտ հրաժարվենք այն անառարկելի պնդումից, որ ժողովրդագրական խնդիրները կարելի է լուծել նյութական պայմանների բարելավմամբ: Ամբողջ համաշխարհային փորձը ցույց է տալիս հակառակը. որքան լավ են ապրում մարդիկ, այնքան քիչ երեխաներ են ունենում: Ամենաբարձր ծնելիության մակարդակը գրանցվում է աղքատ երկրներում, իսկ ամենավատը` հարուստ երկրներում»,- ասել է Մատվեյչյովը, գրում է «Коммерсантъ»-ը:
Պատգամավորը միաժամանակ քննադատել է երեխա ունեցող ընտանիքներին ֆինանսական աջակցություն տրամադրելու գաղափարը. «Այդ բոլոր «մեզ բնակարան տվեք, մեզ նպաստ տվեք, և մենք կհամաձայնենք երեխա ունենալ» կարգի խոսակցություններն ընդամենը խորամանկություն են»: Մատվեյչյովը հղիության արհեստական ընդհատումը համեմատել է ռազմական կորուստների հետ՝ նշելով, որ «աբորտներից նույնքան մարդ է մահանում, որքան Հատուկ ռազմական գործողության ժամանակ»:
«ԽՍՀՄ-ում հղիության արհեստական ընդհատման օրինականացումից հետո ինքներս ավելի շատ մարդ սպանեցինք, քան Հիտլերը»,- ընդգծել է նա։ Պատգամավորը ափսոսանքով նշել է, որ ռուսաստանցիներն «ապրում են ներկայով» և «ցանկանում են կյանքից ամեն ինչ ստանալ», իսկ կանայք այժմ կարիերան գերադասում են ընտանիքից, որի համար, ըստ նրա, «ոչ ոք պատժից չի խուսափի»։
Մատվեյչյովի գործընկեր Վիտալի Միլոնովը քննարկման ժամանակ նշել է, որ կանանց հղիության արհեստական ընդհատման դիմելուն ամենից հաճախ համոզում են տղամարդիկ, ուստի, նրա կարծիքով, «պետք է ուշադրություն դարձնել քարոզչությանը»։ Միլոնովը հավելել է, որ «իսկական տղամարդը երբեք հղիության արհեստական ընդհատում թույլ չի տա»։
Մեկ այլ պատգամավոր՝ Նիկոլայ Նիկոլաևը, Ռուսաստանին մեղադրեցլ է«իր ծայրահեղ լիբերալ հակառակորդներին ընդօրինակելու» մեջ և կոչ է արել «պայքարել համակարգի հիմնարար արատի դեմ»։ Նա ընդգծել է, որ ռուսական էթիկան «հիմնված է ուղղափառության վրա», ուստի «երեխայի կյանքը պետք է ճանաչվի դեռ ծնվելուց առաջ»։
Լսումների ժամանակ ելույթ ունեցավ նաև երեց Ֆյոդոր Լուկյանովը՝ աբորտի և հակաբեղմնավորիչների խթանման միջոցով կնոջ աբորտի իրավունքը համեմատելով նացիստ Հայնրիխ Հիմլերի՝ խորհրդային բնակչությանը ոչնչացնելու ծրագրի հետ: Նա առաջարկել է դադարեցնել Ռուսաստանի համագործակցությունը Առողջապահության համաշխարհային կազմակերպության հետ, քանի որ ԱՀԿ-ն ճանաչում է կանանց հղիության արհեստական ընդհատման իրավունքը։
Նման նախաձեռնությունները հնչում են երկրում արագ վատթարացող ժողովրդագրական իրավիճակի պայմաններում: Росстат-ի տվյալներով՝ 2025 թվականի առաջին եռամսյակում ծնունդների թիվը նախորդ տարվա համեմատ նվազել է 4%-ով՝ հասնելով 288 հազար 800 երեխայի, ինչն, ըստ ժողովրդագիր Ալեքսեյ Ռակշայի, 18-րդ և 19-րդ դարերից ի վեր ամենացածր թիվն է:
2024 թվականին Ռուսաստանում ծնվել է 1,222 միլիոն երեխա՝ ամենացածր թիվը 1999 թվականից ի վեր: Մահացությունների թիվը կազմել է ավելի քան 1,8 միլիոն, իսկ տարվա ընթացքում բնակչության բնական նվազումը կազմել է գրեթե 600 հազար: Վերոնշյալ թվերի հրապարակումից հետո իշխանությունները ծնելիության մակարդակի և ընդհանուր բնակչության թվի վերաբերյալ մանրամասն տվյալները գաղտնիացրել են:
