նախընտրելի դարձնել
Լեհաստանի Սեյմն ընդունել է փոփոխություն կենդանիների պաշտպանության մասին օրենքում, որն արգելում է փափկամազ կենդանիների բուծումը, հաղորդել է RMF24-ը։
Փոփոխության համաձայն՝ փափկամազ կենդանիներ բուծող ֆերմերները պարտավոր կլինեն դադարեցնել գործունեությունը մինչեւ 2033թ․ վերջը։ Նրանք, ովքեր դա կանեն մինչեւ 2031թ․, փոխհատուցման իրավունք կունենան։
Փոխհատուցման չափը կախված կլինի բուծողի տարեկան միջին եկամտից եւ դադարեցման ամսաթվից։ Որքան ուշ լինի դադարեցումը, այնքան ցածր կլինի փոխհատուցումը։
Ձեռներեցները, որոնք կդադարեցնեն գործունեությունը մինչեւ 2027թ․ հունվարի 1-ը, կկարողանան պահանջել բուծողի 2020-2024թթ․ տարեկան միջին եկամտի 25 տոկոսին համարժեք փոխհատուցում։
Նրանք, ովքեր կորոշեն դա անել մեկ տարի անց, կստանան 20 տոկոս փոխհատուցում։ Գումարը կնվազի 5 տոկոսային կետով՝ մինչեւ 5 տոկոս փոխհատուցում, նրանց համար, ովքեր կդադարեցնեն գործունեությունը մինչեւ 2031թ․ հունվարի 1-ը։ Հետագայում բիզնեսի փակումը կնշանակի, որ անհնար կլինի հայտ ներկայացնել փոխհատուցման համար։
Փոփոխությունը նախատեսում է փափկամազ կենդանիների բուծման եւ աճեցման լիակատար արգելք, բացառությամբ ճագարների, օրենքի ուժի մեջ մտնելու պահից, այսինքն՝ դրա հրապարակումից 14 օր անց։
Փոփոխության օգտին քվեարկել է 339 պատգամավոր, դեմ՝ 78, ձեռնպահ՝ 19։
