Նախընտրելի
Կոլումբիայի արտաքին գործերի նախարարությունը հայտարարել է, որ երկիրը հետ է կանչել իր դեսպանին՝ Միացյալ Նահանգներից այն բանից հետո, երբ ԱՄՆ նախագահ Դոնալդ Թրամփը հայտարարել է, որ կբարձրացնի մաքսատուրքերը հարավամերիկյան երկրի նկատմամբ և կդադարեցնի բոլոր վճարումները՝ կապված թմրանյութեր տեղափոխելու կասկածանքով նավերի վրա ԱՄՆ ռազմական հարվածների հետևանքով առաջացած հակամարտության հետ, հաղորդում է Reuters-ը։
Կիրակի օրը Թրամփը նաև Կոլումբիայի նախագահ Գուստավո Պետրոյին անվանել է «ապօրինի թմրաբիզնեսի առաջնորդ», ինչը Պետրոյի կառավարությունը վիրավորական է համարել։
«Միացյալ Նահանգներում Կոլումբիայի դեսպանը՝ Դանիել Գարսիա-Պենյան, հետ է կանչվել խորհրդակցությունների համար և այժմ գտնվում է Բոգոտայում», – հայտնել է Կոլումբիայի արտաքին գործերի նախարարությունը։
Թրամփը հայտարարել է, որ Կոլումբիային տրամադրվող ԱՄՆ ֆինանսական օգնությունը կդադարեցվի, իսկ նոր մաքսատուրքերի մասին մանրամասները կհրապարակվեն երկուշաբթի օրը։ Ներկայումս Կոլումբիան 10% մաքսատուրք է վճարում դեպի ԱՄՆ ներմուծվող ապրանքների մեծ մասի համար։
«Պարո՛ն Թրամփ, Կոլումբիան երբեք կոպիտ չի եղել Միացյալ Նահանգների հետ... բայց դուք կոպիտ եք և տգետ Կոլումբիայի նկատմամբ։ Քանի որ ես գործարար չեմ, առավել ևս՝ թմրավաճառ։ Իմ սրտում ագահություն չկա», - ասել է Կոլումբիայի նախագահ Գուստավո Պետրոն։
