ԱՄՆ-ն պատժամիջոցներ է սահմանել Կոլումբիայի նախագահի, նրա ընտանիքի անդամների և ՆԳՆ ղեկավարի դեմ

ԱՄՆ նախագահ Դոնալդ Թրամփի վարչակազմը ուրբաթ օրը պատժամիջոցներ է սահմանել Կոլումբիայի նախագահ Գուստավո Պետրոյի, նրա ընտանիքի և կառավարության անդամներից մեկի նկատմամբ՝ թմրանյութերի գլոբալ առևտրին մասնակցության մեղադրանքներով, ինչը կտրուկ սրել է լարվածությունը Հարավային Ամերիկայում ԱՄՆ-ի ամենամոտ դաշնակիցներից մեկի ձախակողմյան առաջնորդի հետ հարաբերություններում, հաղորդում է Associated Press-ը։

Ֆինանսների նախարարությունը պատժամիջոցներ է կիրառել Պետրոյի, նրա կնոջ՝ Վերոնիկա դել Սոկորո Ալկոսեր Գարսիայի, նրա որդու՝ Նիկոլաս Ֆերնանդո Պետրո Բուրգոսի և Կոլումբիայի ներքին գործերի նախարար Արմանդո Ալբերտո Բենեդետիի նկատմամբ։

«Պետրոն թույլ է տվել, որ թմրակարտելները ծաղկեն և հրաժարվել է դադարեցնել այդ գործունեությունը,- ասվում է ֆինանսների նախարար Սքոթ Բեսենթի հայտարարության մեջ։- Նախագահ Թրամփը վճռական գործողություններ է ձեռնարկում մեր երկիրը պաշտպանելու համար և հասկացնում, որ մենք չենք հանդուրժի մեր երկիր թմրանյութերի ապօրինի ներմուծումը»։

Այս շաբաթ Թրամփի վարչակազմը տարածել է իր ռեպրեսիաները Խաղաղ օվկիանոսի արևելյան հատվածի վրա, ուր աշխարհի խոշորագույն արտադրողները մաքսանենգ ճանապարհով ներմուծում են կոկաինի մեծ մաս (ներառյալ Կոլումբիան)։

Ուրբաթ օրը Պենտագոնը հայտարարել է, որ տարածաշրջանում ռազմական հզորության աճի կապակցությամբ, ամերիկյան զինվորականները ավիակիր են ուղարկում Հարավային Ամերիկայի ափերի մոտ գտնվող ջրեր։

Անցյալ ամիս գրեթե 30 տարվա ընթացքում առաջին անգամ Կոլումբիան՝ տարածաշրջանում ամերիկյան օգնության գլխավոր ստացողը, ԱՄՆ-ի կողմից ընդգրկել է այն երկրների ցանկում, որոնք հրաժարվում են համագործակցել թմրանյութերի դեմ պայքարում:

Թրամփը վերջերս հայտարարել է, որ կկրճատի Կոլումբիային տրամադրվող օգնությունը և մաքսատուրքեր կսահմանի դրա արտահանման վրա՝ Պետրոյին սոցիալական ցանցերում անվանելով «նարկոլիդեր»։

«Նա մի տղա է, որը շատ թմրանյութ է արտադրում,- չորեքշաբթի օրը Օվալաձև գրասենյակում կայացած ասուլիսում լրագրողներին ասել է Թրամփը։- Լավ կլինի, որ նա զգույշ լինի, այլապես մենք շատ լուրջ միջոցներ կձեռնարկենք նրա և նրա երկրի դեմ»։

Թմրանյութերի ապօրինի շրջանառության հետ կապեր ունենալու մեջ Թրամփի մեղադրանքներից հետո, Պետրոն չորեքշաբթի օրը հայտարարել է, որ դիմելու է ԱՄՆ դատական համակարգին՝ ինքնապաշտպանվելու համար։

Դրանից մեկ օր առաջ Պետրոյի թմրանյութերի դեմ պայքարի քաղաքականությունը դարձել է նրա և Կոլումբիայում ԱՄՆ գործերի ժամանակավոր հավատարմատար Ջոն ՄաքՆամարայի հանդիպման առարկան։ Հինգշաբթի օրը ՄաքՆամարան հանդիպել է նաև արտաքին գործերի նախարար Ռոզա Յոլանդա Վիլյավիսենսիո Մապիի հետ։

Պետրոն բազմիցս պաշտպանել է իր քաղաքականությունը, որը շեղվում է ռեպրեսիվ մոտեցումից և առաջնահերթություն է տալիս կոկա մշակողների (որոնք կոկաինի արտադրության հումքն են) հետ համաձայնագրերի ձեռքբերմանը՝ նրանց դրդելով անցնել այլ մշակաբույսերի, ինչպես նաև խոշոր թմրապարոնների հետապնդմանը և փողերի լվացման դեմ պայքարին։