Չնայած պատժամիջոցներին և մատակարարումների զգալի կրճատմանը՝ Եվրոպական միությունը մնում է Ռուսաստանի երրորդ խոշորագույն առևտրային գործընկերը, գրում է գերմանական Bild պարբերականը։
Ըստ լրատվամիջոցի տվյալների, 2024 թվականին Ռուսաստանի և ԵՄ-ի միջև առևտրաշրջանառությունը կազմել է մոտ 67,5 միլիարդ եվրո։ Թեև սա շատ ավելի քիչ է, քան մինչև պատերազմը, այդուհանդերձ, համագործակցությունը լիովին չի դադարել։ Գերմանիան ռուսաստանյան ապրանքների ներմուծումը կրճատել է 92%-ով, սակայն առևտուրը դեռևս գնահատվում է 9,5 միլիարդ դոլար։
Ֆրանսիան և Նիդեռլանդները պահպանում են ներմուծման կայուն, թեև ոչ բարձր մակարդակ՝ յուրաքանչյուրն ավելի քան 6 միլիարդ դոլար։ Սլովակիան, Չեխիան, Իսպանիան, Բելգիան և Իտալիան կրճատել են գնումները մինչպատերազմյան 2021 թվականի համեմատ, մինչդեռ Հունգարիան, ընդհակառակը, Ռուսաստանից ներմուծումն ավելացրել է 31%-ով, և երկրների միջև ընդհանուր ապրանքաշրջանառությունը հասել է մոտ 6,2 միլիարդ դոլարի։
Եվրոպայից դուրս Ռուսաստանի տնտեսության պահպանման գործում գլխավոր դեր են խաղում ասիական գործընկերները։ Չինաստանը ռուսաստանյան ապրանքների, առաջին հերթին նավթի, գազի և ածուխի, խոշորագույն գնորդն է։
2024 թվականին ներմուծման ծավալը կազմել է 130 միլիարդ դոլար, իսկ երկու երկրների միջև ընդհանուր առևտրաշրջանառությունը հասել է մոտ 244,8 միլիարդ դոլարի։
Հնդկաստանը, որը մինչև պատերազմը Ռուսաստանի առևտրային գործընկերների շարքում զբաղեցնում էր ընդամենը 12-րդ տեղը, այժմ դարձել է երկրորդ կարևորագույն ներմուծողը՝ հիմնականում նավթի գնումների շնորհիվ։
Այսպիսով, պատժամիջոցների ճնշման ներքո Ռուսաստանն ավելի ու ավելի է վերակողմնորոշում տնտեսական կապերը դեպի Արևելք, մինչդեռ Եվրոպան, մնալով կարևոր, բայց ավելի զուսպ գործընկեր, աստիճանաբար կրճատում է մասնակցությունը Ռուսաստանի առևտրին։
նախընտրելի դարձնել
