Նախընտրելի
Լիբանանի նախագահ Ժոզեֆ Աունը ԱՄՆ դեսպան Մորգան Օրտագուսի հետ հանդիպման ժամանակ կոչ է արել դադարեցնել իր երկրի վրա Իսրայելի հարվածները ՝ Լիբանանի վրա Իսրայելի հարձակումների սրման ֆոնին, հաղորդում է Ֆրանսպրես գործակալությունը (AFP)։
Իսրայելը բազմիցս ռմբակոծել է Լիբանանը՝ չնայած նոյեմբերին կնքված հրադադարի համաձայնագրին, որը նպատակ ուներ դադարեցնել «Հըզբոլլահ»-ի հետ ավելի քան մեկ տարի տևած մարտերը, սովորաբար պնդելով, որ հարվածները ուղղված են շարժման անդամներին։ Ըստ երկրի առողջապահության նախարարության՝ միայն հոկտեմբերին Լիբանանում Իսրայելի հարվածներից 23 մարդ է զոհվել։
Նախագահական գրասենյակի տարածած հայտարարության մեջ նշվում է, որ Աունը ԱՄՆ դեսպանի հետ հանդիպման ժամանակ խոսել է «ռազմական գործողությունների դադարեցման մոնիթորինգի կոմիտեի աշխատանքը ակտիվացնելու անհրաժեշտության մասին... մասնավորապես՝ Իսրայելի կողմից շարունակվող խախտումները դադարեցնելու հարցում»։ Հինգ անդամից բաղկացած կոմիտեն, որի կազմում են նաև Միացյալ Նահանգների և Ֆրանսիայի ներկայացուցիչները, պատասխանատու է հրադադարի պահպանման համար:
Օրտագուսը, ինչպես սպասվում է, կմասնակցի հանձնաժողովի այս շաբաթ անցկացվելիք նիստին։ Աունը միաժամանակ ընդգծել է «հարավի բնակիչներին իրենց տները վերադառնալու և վնասված տնները վերանորոգելու հնարավորություն տալու անհրաժեշտությունը, հատկապես երբ ձմեռ է մոտենում»։
Վերջին շաբաթներին Իսրայելը թիրախավորում է էքսկավատորներն ու բուլդոզերները: Լիբանանի պաշտոնյաները կարծում են, որ այս հարվածները նպատակ ունեն կանխել պատերազմից տուժած հարավում վերականգնողական ցանկացած աշխատանք: ՄԱԿ-ի մարդու իրավունքների գրասենյակը երեքշաբթի օրը հայտարարեց, որ հաստատել է, որ իսրայելական ուժերը Լիբանանում հրադադարի հաստատումից ի վեր 111 քաղաքացիական անձի են սպանել:
