Պենտագոնի ղեկավար Փիթ Հեգսեթը չորեքշաբթի օրը հայտարարել է, որ ճապոնա-ամերիկյան դաշինքը «կենսական նշանակություն ունի Չինաստանի ռազմական ագրեսիան զսպելու համար», մինչդեռ նրա ճապոնացի գործընկերը հաստատել է պաշտպանական ծախսերի թիրախային ցուցանիշի արագացման ծրագրերը։ Այս մասին հայտնում է AFP-ն։

Այս հայտարարությունները հնչել են երեքշաբթի օրը ԱՄՆ նախագահ Դոնալդ Թրամփի և Ճապոնիայի նոր վարչապետ Սանաե Տակաիչիի միջև կայացած առաջին առանձնազրույցից հետո, որտեղ անվտանգությունը գլխավոր թեմաներից մեկն էր։

Ճապոնիան ավելի ու ավելի կոշտ ռազմական դիրքորոշում է որդեգրում Չինաստանի հետ հարաբերությունների վատթարացմանը զուգընթաց։

«Տարածաշրջանային արտակարգ իրավիճակներին արձագանքելու և Ճապոնիայի հետ ուս ուսի մեր երկրի անվտանգությունն ապահովելու համար մենք անհամբեր սպասում ենք մեր դաշինքի շարունակական ամրապնդմանը», - ասել է Հեգսեթը Տոկիոյում Ճապոնիայի պաշտպանության նախարար Շինջիրո Կոիզումիի հետ հանդիպման ժամանակ։

Տակաիչին անցյալ շաբաթ հայտարարել էր, որ իր կառավարությունը կհասնի իր նպատակին՝ ֆինանսական այս տարում պաշտպանության վրա ծախսելով համախառն ներքին արդյունքի երկու տոկոսը, ինչը երկու տարով շուտ է նախատեսված ժամկետից։ Միացյալ Նահանգները, որի ռազմական անձնակազմի թիվը Ճապոնիայում կազմում է մոտ 60,000 մարդ, ցանկանում է, որ Տոկիոն ավելի շատ ծախսի՝ հնարավոր է մինչև ՀՆԱ-ի հինգ տոկոսը, ինչպես հայտարարվել է ՆԱՏՕ-ի անդամների կողմից հունիսին։ Ճապոնիայի պաշտպանության նախարար Կոիզումին չորեքշաբթի օրը հաստատել է այս նպատակին հասնելու արագացված ծրագրերը։

«Մենք միջոցներ կձեռնարկենք՝ այս ֆինանսական տարվա ընթացքում ՀՆԱ-ի երկու տոկոսի մակարդակին նախատեսվածից շուտ հասնելու համար», - ասել է Կոիզումին Հեգսեթին Տոկիոյում։ «Հաշվի առնելով այն իրավիճակը, երբ Ճապոնիային հարակից տարածքում հրթիռային ներուժը զգալիորեն ուժեղացվել է, ես կարևոր եմ համարում հետևողականորեն ամրապնդել հակահրթիռային պաշտպանության հնարավորությունները»։

Երեքշաբթի օրը, Տոկիոյի մոտ գտնվող ամերիկյան «Ջորջ Վաշինգտոն» ռազմանավի վրա Թրամփի հետ համատեղ ելույթի ժամանակ, Տակաիչին հարյուրավոր նավաստիներից բաղկացած բազմությանը հայտարարել է, որ ինքը «հանձնառու է Ճապոնիայի պաշտպանական ներուժը հիմնովին ուժեղացնելու» համար՝ նշելով, որ իր երկիրը բախվում է անվտանգության «աննախադեպ» սպառնալիքների։