նախընտրելի դարձնել
Իսպանիայի վարչապետ Պեդրո Սանչեսը մասնակցել է Սենատի պետական պայմանագրերի և կոռուպցիայի հարցերով կոմիտեի լսումներին, որոնց ընթացքում քննարկվել է երկրի կառավարության ղեկավարի շրջապատի հանցավոր գործունեության հարցը, հայտնում է Bloomberg-ը։
Բազմաժամյա լսումների սկզբում Սանչեսը հերքել է, որ տեղյակ է եղել իր երկու մերձավոր դաշնակիցների՝ Սանտոս Սերդանի և Խոսե Լուիս Աբալոսի հանցավոր գործունեության մասին։
Սա Իսպանիայի նորագույն պատմության մեջ երկրորդ դեպքն է, երբ գործող վարչապետին կանչվում են խորհրդարանական քննչական հանձնաժողով։ Նախորդ դեպքը վերաբերում էր Խոսե Լուիս Ռոդրիգես Սապատերոյին, ով, ինչպես և Սանչեսը, ներկայացնում էր Սոցիալիստական կուսակցությունը։
«Սոցիալիստական կուսակցության ֆինանսավորումն ամբողջովին օրինական է և բացարձակապես կանոնավոր», – հայտարարել է Սանչեսը հինգշաբթի օրը Սենատի քննչական հանձնաժողովի նիստում՝ պատասխանելով քաղաքական խմբերի հարցերին։
Նրա խոսքով՝ կուսակցությունը վճարումներն ընդունել է կանխիկ ձևով, «սակայն դրանք միշտ, միշտ, միշտ ուղեկցվել են անդորրագրերով»։
Հունիսին Սանչեսի ամենամոտ դաշնակիցներից մեկը՝ Սանտոս Սերդանը, կալանքի տակ էր վերցվել կազմակերպված հանցագործության, կաշառակերության և ազդեցության չարաշահման կասկածանքով։ Սերդանը զբաղվում էր Սոցիալիստական կուսակցության առօրյա գործունեությամբ։
Այդ պաշտոնում Սերդանի նախորդը՝ Խոսե Լուիս Աբալոսը, նույնպես հետաքննության տակ է գտնվում նմանատիպ մեղադրանքներով, ինչպես նաև միջոցների վատնման համար։
Ընդդիմադիր Ժողովրդական կուսակցությունը կանչել է Սանչեսին ցուցմունք տալու՝ պնդելով, որ նա չէր կարող տեղյակ չլինել, թե ինչ էր կատարվում իր կուսակցությունում կամ կառավարական ծախսերի հետ կապված հարցերում։
Բացի այդ, հետաքննության տակ է գտնվում Իսպանիայի վարչապետի կինը՝ Բեգոնյա Գոմեսը, որը մեղադրվում է առևտրի և կոռուպցիայի մեջ։ Սանչեսը և կառավարությունը հերքում են այդ մեղադրանքները՝ պնդելով, որ հետաքննությունը քաղաքական դրդապատճառներ ունի։
Սանչեսի եղբայրը նույնպես քրեական գործով հետաքննության տակ է՝ կապված ազդեցության հավանական չարաշահման հետ, այն մասին, թե ինչպես է նա աշխատանք ստացել տարածաշրջանային վարչակազմում։ Վարչապետը հերքում է այդ մեղադրանքները՝ դրանք քաղաքական դրդապատճառներով պայմանավորված համարելով։
Բացի այդ, Սանչեսի վրա ճնշումն ուժեղացել է այն բանից հետո, երբ կատալոնական անջատողական Junts կուսակցության առաջնորդ Կառլես Պուչդեմոնը հայտարարել է ընդդիմություն անցնելու մասին։
Junts կուսակցության յոթ պատգամավորներ 2023 թվականի աշնանից ապահովել են խորհրդարանում իսպանացի սոցիալիստների աննշան մեծամասնությունը՝ համագործակցության համաձայնագրի համաձայն, որը չէր նախատեսում նրանց մուտքը կառավարություն։
Դրա դիմաց Սանչեսը խոստացել էր համաներում շնորհել Կատալոնիայի անկախության հանրաքվեի մասնակիցներին, ինչպես նաև ԵՄ մակարդակով կատալոնական իշխանությունների ինքնավարության ընդլայնում և կատալոներեն լեզվի պաշտոնական կարգավիճակի ամրագրում, ինչին նա այդպես էլ չի կարողացել հասնել։
