ՌԴ Անվտանգության խորհրդի նախագահի տեղակալ Դմիտրի Մեդվեդևը շնորհավորել է «Ռուսաստանի բոլոր բարեկամներին» «Պոսեյդոն» միջուկային տորպեդոյի փորձարկման կապակցությամբ, որի մասին նախագահ Վլադիմիր Պուտինը պատմել էր հոկտեմբերի 29-ին։ «Ի տարբերություն «Բուրևեստնիկի», «Պոսեյդոնը» կարելի է համարել Դատաստանի օրվա իրական զենք», – գրել է Մեդվեդևը X-ում՝ տեքստի վերջում դնելով երկու էմոջի՝ կայծակ և գանգ։ Նա առանձին նշել է Բելգիայի պաշտպանության նախարար Թեո Ֆրանկենին, որն ավելի վաղ հայտարարել էր, թե ՆԱՏՕ-ն «Երկրի երեսից կջնջի Մոսկվան»՝ Պուտինի կողմից Եվրոպայի վրա հարձակվելու համար նոր զենք օգտագործելու փորձի դեպքում։ Ի պատասխան օգտատերերից մեկի մեկնաբանության՝ Մեդվեդևը նկատել է, որ «Բելգիան կվերանա», եթե Ռուսաստանը փորձարկի «Պոսեյդոնը» նրա ափերի մոտ։

Պուտինը, հայտարարելով սուզանավից միջուկային տորպեդոյի «հաջող» արձակման մասին, նշել է, որ աշխարհում «շարժման արագությունների և խորությունների առումով նման բան չկա և մոտ ապագայում դժվար թե հայտնվի»։ ««Պոսեյդոնի» հզորությունը զգալիորեն գերազանցում է նույնիսկ մեր ամենահեռանկարային միջմայրցամաքային հեռահարության «Սարմատ» հրթիռի հզորությանը։ Փոխգերազանցման եղանակներ գոյություն չունեն», - ասել է Պուտինը։ Մինչ այդ ռուսական քարոզչությունը «Պոսեյդոնը» ներկայացնում էր որպես զենք, որը կարող է ռադիոակտիվ ցունամիով ջնջել ԱՄՆ-ի առափնյա քաղաքները Երկրի երեսից։

Հոկտեմբերի 26-ին Պուտինը հայտարարել է «Բուրևեստնիկ» հրթիռի «վճռորոշ փորձարկումների» ավարտի մասին։ Այն նոր տեսակի զենք է, որի մասին նա առաջին անգամ պատմել էր 2018 թվականին՝ Դաշնային ժողովին ուղղված ուղերձի ժամանակ։ Նախագահը միջուկային շարժիչով հրթիռն անվանել է «անսահմանափակ հեռահարության եզակի արտադրանք», որի նմանը գոյություն չունի ամբողջ աշխարհում։ Գլխավոր շտաբի պետ Վալերի Գերասիմովը հստակեցրել է, որ հոկտեմբերի 21-ին «Բուրևեստնիկը» 15 ժամվա ընթացքում հաղթահարել է 14 հազար կիլոմետր, «և դա դրա վերջանական սահմանը չէ»։

Նոր հրթիռի մասին հայտարարությունը բացասական արձագանք է առաջացրել ԱՄՆ նախագահ Դոնալդ Թրամփի մոտ։ Նա այն անվանել է «ոչ տեղին»՝ նշելով, որ Պուտինը պետք է մտածի, թե ինչպես ավարտել պատերազմն Ուկրաինայում, այլ ոչ թե զենք փորձարկի և հիշեցրել ռուսական ափեր ուղարկված ամերիկյան միջուկային սուզանավի մասին։

Այդուհանդերձ, Թրամփի խոսքերն ազդեցություն չեն ունեցել։ Այն բանից հետո, երբ Պուտինը պատմել է «Պոսեյդոնի» մասին, ԱՄՆ նախագահը Պենտագոնին հանձնարարել է «անհապաղ» սկսել միջուկային զենքի փորձարկումները՝ առաջին անգամ 33-ամյա դադարից հետո՝ այլ երկրների նմանատիպ գործողությունների պատճառով։ Այս համատեքստում նա հիշատակել է Ռուսաստանը և Չինաստանը։

Ի պատասխան՝ Կրեմլում հավաստիացրել են, որ «Բուրևեստնիկի» և «Պոսեյդոնի» փորձարկումները միջուկային չեն եղել։ Նախագահի մամուլի քարտուղար Դմիտրի Պեսկովը դա կրկնել է մի քանի անգամ՝ ճեպազրույցի ընթացքում պատասխանելով լրագրողների հարցերին։ «Հուսով ենք, որ այս տեղեկությունը ճիշտ է հասցվել Թրամփին», - ասել է նա՝ հիշեցնելով նման փորձարկումների անցկացման մորատորիումի մասին, որն ԱՄՆ-ն և Ռուսաստանը մտցրել են 1990-ականներին։

Պեսկովը հավելել է, որ Վաշինգտոնը Մոսկվային չի ծանուցել փորձարկումները վերսկսելու մտադրության մասին և զգուշացրել է, որ եթե «ինչ-որ մեկը հրաժարվի մորատորիումից, Ռուսաստանը կգործի համապատասխան ձևով»։