Իշխող «Վրացական երազանք» կուսակցությունը հայց է ներկայացրել Սահմանադրական դատարան՝ պահանջելով արգելել երեք հիմնական ընդդիմադիր կուսակցությունների գործունեությունը, հաղորդում է «Նովոստի-Գրուզիան»։

Պահանջի գրանցման հարցը կորոշվի առաջիկա երեք օրվա ընթացքում։

Իշխող կուսակցությունը պահանջում է, որ «Միացյալ ազգային շարժում», «Հզոր Վրաստան - Լելո» և «Փոփոխությունների համար կոալիցիա» կուսակցությունները ճանաչվեն հակասահմանադրական։

«Սահմանադրական դատարանը ինը ամիս ժամանակ կունենա տվյալ հարցի վերաբերյալ որոշում կայացնելու համար։ Հայցն այնքան շատ ապացույցներ ունի, այնքան ակնհայտ է երևում այն չարիքը, որ այդ կողմերը պատճառել են երկրին, որ ես չեմ պատկերացնում աշխարհում որևէ դատարան, որը կմերժի բավարարել այդ հայցը», — հայտարարել է «Վրացական երազանք» կուսակցության պատգամավոր Դավիթ Մաթիկաշվիլին։

Ավելի վաղ ցուցակում էր նաև նախկին վարչապետ Գախարիայի «Վրաստանի համար» կուսակցությունը, սակայն իշխող կուսակցությունում որոշել են չկասեցնել դրա աշխատանքը՝ խորհրդարանական բոյկոտը դադարեցնելուց հետո։

Ընդդիմության հիմնական մասն արգելելու պլաններն, ինչպես և սպասվում էր, կտրուկ մեկնաբանություններ են առաջացրել Եվրոպայում։

Եվրախորհրդարանի՝ Վրաստանի հարցերով զեկուցող Ռասա Յուկնևիչենեն սոցցանցերում գրել է, որ «լուրերը ցնցող են» և որ ««Վրացական երազանքը» դառնում է Լուկաշենկոյի երկվորյակը՝ ըստ կրեմլյան դասագրքի»։

«Ընդդիմության նման հետապնդումը ոչ միայն քանդում է բազմակուսակցական ժողովրդավարությունը, այլև մասնատում է հասարակությունը, ոչնչացնում է պետությունը», — հայտարարել է Վրաստանի հինգերորդ նախագահ Սալոմե Զուրաբիշվիլին։

«Ազգային շարժում»-ի առաջնորդներից Լևան Բեժաշվիլին ասել է, որ հարցն անպայման բողոքարկվելու է Մարդու իրավունքների եվրոպական դատարանում։ «Եվրոպական դատարանի պրակտիկան և փաստարկները միանշանակ մեր օգտին են։ Եվրոպական դատարանում բավականին բարձր չափանիշներ կան կուսակցությունների լուծարման վերաբերյալ, ուստի այս գործընթացն այսպես չի ավարտվի», — հայտարարել է Բեժաշվիլին։