ԱՄՆ նախագահ Դոնալդ Թրամփը հայտարարել է, որ մտադիր չէ զիջել իրեն ընդդիմադիր Դեմոկրատական կուսակցության կողմից իրականացվող շանտաժին և գործարքի գնալ՝ դաշնային կառավարության աշխատանքի ֆինանսավորման դադարեցումը (շաթդաունը) ավարտելու համար։ Այս մասին նա հայտարարել է CBS News հեռուստաալիքին տված հարցազրույցում։

Լրագրողը նշել է, որ Թրամփը նախկինում հմտորեն փոխզիջումներ էր գտնում և խուսափում շաթդաուններից։ «Ես շատ լավ եմ դա անում։ Բայց չեմ անի դա՝ ենթարկվելով դեմոկրատների շանտաժին, որոնք շեղվել են ճանապարհից։ Այդ մարդկանց հետ ինչ-որ բան այն չէ», - ասել է Սպիտակ տան ղեկավարը։

«[ԱՄՆ Կոնգրեսի Սենատի դեմոկրատական փոքրամասնության առաջնորդ Չակ] Շումերը անհույս դեպք է։ Եվ նա կորցնելու բան չունի։ Նա վերածվել է կամիկաձե-օդաչուի», - հավելել է ամերիկացի նախագահը։ Միևնույն ժամանակ, Թրամփը վստահություն է հայտնել, որ շաթդաունը շուտով կավարտվի և ամերիկյան կառավարության ֆինանսավորումը կվերականգնվի։ «Մենք կլուծենք դա։ Ի վերջո, նրանք ստիպված կլինեն քվեարկել», - ասել է Սպիտակ տան ղեկավարը։

Միացյալ Նահանգների դաշնային կառավարության աշխատանքի մասնակի դադարեցումը սկսվել է հոկտեմբերի 1-ի կեսգիշերին՝ ֆինանսավորման բացակայության պատճառով։ Դա տեղի է ունեցել այն պատճառով, որ իշխող Հանրապետական և ընդդիմադիր Դեմոկրատական կուսակցությունների ներկայացուցիչները Կոնգրեսում չեն կարողացել համաձայնության գալ ծախսերի մի շարք հոդվածների շուրջ, ներառյալ առողջապահության ոլորտում։ Դեմոկրատներն ու հանրապետականները միմյանց մեղադրում են շաթդաուն հրահրելու և այն քաղաքական նպատակներով ձգձգելու մեջ։