Նախընտրելի
Կիպրոսի նախագահ Նիկոս Քրիստոդուլիդեսը Թուրքիային մեղադրել է իմպերիալիստական վարքագծի և տարածաշրջանում նեոօսմանյան մոտեցում ներդնելու փորձերի մեջ, հայտնել է Euronews-ը։
Այս խոսքերը հնչել են, երբ Թուրքիայի նախագահ Ռեջեփ Թայիփ Էրդողանը իսլամական աշխարհին կոչ է արել ուժեղացնել աջակցությունը Հյուսիսային Կիպրոսի Թուրքական Հանրապետության ժողովրդին, որը ճանաչում է միայն Անկարան։ Իսլամական համագործակցության կազմակերպության տնտեսական և առևտրային համագործակցության մշտական կոմիտեի 41-րդ նիստի ելույթում Էրդողանը հայտարարել է, որ «կիպրոսցի թուրքերը իսլամական աշխարհի անբաժանելի մասն են և չեն հրաժարվել արժանապատիվ կյանքի համար պայքարից»։ Նա հայտարարել է նաև, որ Կիպրոս կղզին դարձել է «իմպերիալիստական խաղի» պատանդը Միջերկրական ծովի արևելքում՝ վերահաստատելով Անկարայի աջակցությունը Կիպրոսի խնդրի երկու պետությունների լուծմանը։
Իր հերթին, Քրիստոդուլիդեսը հայտարարել է, որ կշարունակի աշխատել կարգավորման գործընթացի առաջխաղացման ուղղությամբ՝ ընդգծելով, որ Կիպրոս հունական կողմը բանակցությունների ձգձգումների համար որևէ պատասխանատվություն չի կրում։
2017 թվականին փակուղի մտած բանակցային գործընթացը ՀԿԹՀ-ում նախագահական ընտրություններում ընդդիմության առաջնորդ Թուֆան Էրհուրմանի հաղթանակից հետո կարող է նոր թափ ստանալ: Նա կողմ է կիպրոսցի հույների հետ երկխոսությանը՝ 1974 թվականից ի վեր բաժանված Կիպրոսում միասնական դաշնային պետություն ստեղծելու համար: Սպասվում է, որ բանակցությունները շուտով կվերսկսվեն:
