նախընտրելի դարձնել
Ըստ նոր հարցման արդյունքների՝ իսրայելցիների մեծ մասի կարծիքով ԱՄՆ նախագահ Դոնալդ Թրամփի վարչակազմն ավելի մեծ ազդեցություն ունի Իսրայելի անվտանգության վրա, քան վարչապետ Բենիամին Նեթանյահուի կառավարությունը, գրում է Times of Israel-ը։
Իսրայելցիների 44 տոկոսը նշել է, որ ԱՄՆ-ն ավելի մեծ ազդեցություն ունի, 23%-ը համարում է. որ Իսրայելն ավելի մեծ ազդեցություն ունի, իսկ 28%-ի կարծիքով՝ երկուսն էլ հավասարապես ազդում են Իսրայելի անվտանգության վրա՝ ըստ Իսրայելի ժողովրդավարության ինստիտուտի պատրաստած՝ 2025 թվականի հոկտեմբերի Իսրայելի քվեարկության ինդեքսի։
Հարցումն արվել է Գազայի հրադադարի ռեժիմի պայմաններում, որը դեպքերի ճնշող մեծամասնությամբ իրականացնում է Թրամփի վարչակազմը։
Հարցման մասնակիցներին հարցրել են նաև Իսրայելի կողմից Արևմտյան ափի հնարավոր բռնակցման մասին, որի իրագործումը վերջերս բացառել է ԱՄՆ նախագահ Դոնալդ Թրամփը։
Երեսունհինգ տոկոսը կողմ է Արևմտյան ափի բռնակցմանը, 33%-ը՝ պաղեստինցիների հետ դիվանագիտական համաձայնագրի կնքմանը, իսկ 18%-ը ցանկանում է, որ ամեն ինչ մնա այնպես, ինչպես կա։
Հարցվածների 51 տոկոսը նշել է, որ դատական համակարգը բարեփոխելու համար կառավարության կասեցրած օրենսդրության վերականգնումը սխալ է, մինչդեռ 33%-ը հակառակ կարծիքն է հայտնել: Հրեական ժողովրդի քաղաքականության ինստիտուտի անցկացրած առանձին հարցումը ցույց է տվել, որ իսրայելցիները միասնական կարծիք չունեն պատերազմի համար համապատասխան անվանման հարցում:
Հարցվածների 42 տոկոսը նախընտրել է պատերազմն անվանել «Հոկտեմբերի 7-ի պատերազմ», 16%-ը՝ կառավարության վերջերս ընտրած «Վերածննդի պատերազմ», 13%-ը՝ Իսրայելի պաշտպանության բանակի սկզբնական անվանումը՝ «Երկաթե սրեր», 12%-ը՝ «Սիմխատ Թորայի պատերազմ», 7%-ի կարծիքով՝ այս անվանումներից ոչ մեկը ճշգրիտ չէ, իսկ 10%-ը դժվարացել է պատասխանել:
