Նախընտրելի
Կարիերայի GoTeach տոնավաճառը DHL Armenia-ի և «Tecah for Armenia» ծրագրի նախաձեռնությունն է, որն անցկացվել է Երևանում՝ DHL Group-ի և «Teach For All» ցանցի միջև գլոբալ գործընկերության շրջանակում։ Ձևաչափը, որն ի սկզբանե պետք է լիներ մարզերի դպրոցականների և ժամանակակից մասնագիտությունների ներկայացուցիչների հանդիպման վայր, վերածվել է կարիերայի հնարավորությունների ցուցադրման և երկրի աշխատաշուկայի իրական վիճակի քննարկման հարթակի։ Խոսել են գործատուների պահանջների, ապագայի հմտությունների մասին և՝ թե ինչպես է այսօր իրականում կառուցվում մասնագիտական հետագիծը։
Միջոցառումը միավորել է ավելի քան երեսուն աշակերտի Տավուշի, Վայոց Ձորի, Կոտայքի, Արմավ իրի, Սյունիքի և Գեղարքունիքի մարզերից, որոնք մայրաքաղաք էին եկել իրենց ուսուցիչների՝ Teach For Armenia Ուսուցիչ-առաջնորդների հետ։ Մասնակիցների մեծ մասի համար սա առաջին հնարավորությունն էր տեսնելու, որ մասնագիտությունը որոշումների, կասկածների, սխալների և հնարավորությունների կենդանի համակարգ է։ Ուստի կազմակերպիչները շեշտը դրել են ոչ թե դասախոսության ձևաչափի, այլ՝ երկխոսության վրա. շրջանավարտ-դեսպանների կենդանի պատմություններ, բաց հարցեր և իրական դեպքերի քննարկումներ։
Ծրագիրը սկսվեց TED Talk-ների շարքով, որտեղ Teach For Armenia ծրագրի շրջանավարտները կիսվեցին իրենց կարիերայի ուղիներով. մեկը տարվել էր արհեստով՝ առաջին անգամ կավը ձեռքն առնելով, մյուսը՝ հասկացել, որ իր դասավանդման փորձը կիրառելի է հեռահաղորդակցության ոլորտում, մեկ ուրիշը սպորտի ուղղությամբ գնաց՝ մանկության տարիներին մարզումներից և ենթակառուցվածքների բացակայությունից հետո. մեկն էլ վերապրել էր պատերազմը, հայրենի գյուղ վերադարձը և մասնագիտական որոնումները, որոնք, ի վերջո, հանգեցրին միջազգային կրթական նախագծի։ Բոլոր ելույթների ընդհանուր թեման այն էր, որ մասնագիտական ինքնությունը ձևավորվում է ոչ թե դպրոցում կատարված «ճիշտ» ընտրության, այլ հնարավորությունը ճանաչելու և այն փորձի վերածելու ունակության միջոցով։
Անձնական պատմություններից հետո ուշադրությունը կենտրոնացավ վերլուծության վրա։ «Պատրաստվելով ապագայի աշխատաշուկային» պանելային քննարկումը միավորել էր տեխնոլոգիաների, բանկային, մարդկային ռեսուրսների, լոգիստիկայի և կորպորատիվ հաղորդակցության ոլորտների ներկայացուցիչներին։ Մասնակիցները քննարկեցին, թե Հայաստանում ինչպես է զարգանում աշխատաշուկան և որ ոլորտներն են առանցքային դառնում։
Կարևոր դիտարկում արվեց. դեռևս ոչ մի անհետացող մասնագիտություն չկա, բայց անհետանում է այն պատրանքը, որ կարելի է աշխատել առանց գիտելիքները թարմացնելու: Տեխնոլոգիական փոփոխություններն արագանում են, և նրանք, ովքեր կարող են սովորել, հարմարվել և համատեղել տարբեր հմտություններ, առավել դիմացկուն են դուրս գալիս։
Մասնակիցները հատուկ ուշադրություն դարձրին արագ զարգացող ոլորտներին, ինչպիսիք են արհեստական բանականությունը, տվյալների մշակումը, ինժեներական լուծումները և թվային բանկինգը: Նշվեց, որ ֆինանսական ոլորտում աճում է ռիսկերի կառավարման, համապատասխանության, ֆինանսական մոնիթորինգի, պատժամիջոցների վերահսկման և տեղեկատվական տեխնոլոգիաների անվտանգության մասնագետների պահանջարկը: Այս մասնագիտությունները մեծ մասամբ աննկատ են մնում լայն հանրության համար, բայց կարևոր դեր են խաղում համակարգի կայունության և վստահության կառուցման գործում՝այդպիսով ամենահեռանկարայիննեից դառնալով:
Մասնակիցները շեշտեցին, որ տեխնոլոգիան չի նսեմացնում հումանիտար հմտությունների կարևորությունը: Հաղորդակցությունը, թարգմանությունը, բարդ գործընթացները բացատրելու, մարդկանց հետ աշխատելու և երկխոսություն կառուցելու ունակությունը՝ այս բոլոր հմտությունները պահպանում են իրենց դերը և դառնում մրցակցային առավելություններ: Արհեստական բանականությունը կդառնա հիմնական գործիք, ինչպես մի ժամանակ ինտերնետն էր, բայց իմաստի, բառապաշարի նրբության և վստահության կառուցման պատասխանատվությունը կմնա մարդկանց վրա: Ահա թե ինչու մասնագետները տեխնիկական գրագիտության և մարդկային կարողությունների համադրությունն անվանեցին առաջիկա տարիների հիմնական բանաձև։
Մարզերի դպրոցականների համար այս ձևաչափը մնում է ժամանակակից մասնագիտությունների հետ անմիջական շփման քիչ գործիքներից մեկը. այստեղ նրանք ստանում են ոչ թե ընդհանուր առաջարկություններ, այլ կարիերայի ուղիների, ոլորտի պահանջների և աշխատաշուկայի իրական գործունեության ըմբռնման կոնկրետ օրինակներ։ Այս մոտեցումը օգնում է նախապես հարթել մայրաքաղաքի և մարզերի միջև տեղեկատվական բացը և դեռահասների մեջ սերմանել իրատեսական կողմնորոշիչներ իրենց ապագա հեռանկարների վերաբերյալ։
