Հայտնի ֆինանսիստ Ջեֆրի Էպշտեյնի դեմ սեռական շահագործման նպատակով մարդկանց վաճառքի գործով 2019 թվականի գաղտնի մեծ ժյուրիի սղագրությունները, ըստ ամենայնի, կհրապարակվեն: Չորեքշաբթի դատավորը որոշել է միանալ հանգուցյալ ֆինանսիստի սեռական բռնությանն առնչվող  հետաքննության նյութերը բացահայտելու վերաբերյալ Արդարադատության նախարարության հարցապնդումները բավարարած երկու այլ դատավորների, հայտնել է Associated Press-ը։

ԱՄՆ շրջանային դատավոր Ռիչարդ Բերմանը չեղյալ հայտարարեց իր նախորդ որոշումը՝ նյութերը գաղտնի պահելու վերաբերյալ՝ հղում անելով նոր օրենքին, որը պահանջում է կառավարությանը բացել Էպշտեյնի և նրա վաղեմի վստահելի անձնավորության՝ Գիսլեյն Մաքսվելի վերաբերյալ իր դոսյեն։

Դատավորը ավելի վաղ զգուշացրել էր, որ հրապարակման համար նախատեսված մեծ ժյուրիի մոտ 70 էջանոց նյութերը, հավանաբար, հազիվ թե մերկացնող լինեն և «պարզապես ասեկոսեների մի հատված» են Էպշտեյնի վարքագծի մասին։ Երեքշաբթի օրը Մանհեթենի մեկ այլ դաշնային դատավոր հրամայել էր հրապարակել Մաքսվելի՝ 2021 թվականի սեռական շահագործման գործին առնչվող նյութերը։

Անցյալ շաբաթ Ֆլորիդայի դատավորը հաստատել է Էպշտեյնի վերաբերյալ 2000-ականներին դաշնային մեծ ժյուրիի անցկացրած հետաքննության արձանագրությունների գաղտնազերծումը։