Նիգերիայի հյուսիսային Նիգեր նահանգի գյուղերից մեկի վրա զինյալների հարձակման հետևանքով առնվազն 30 բնակիչ է սպանվել, ևս մի քանի հոգի առևանգվել է, հայտնում է ABC News-ը՝ հղում անելով տեղի ոստիկանությանը։

Շաբաթ երեկոյան զինյալները ներխուժել են Նիգերիայի Նիգեր նահանգի Բորգու շրջանի Կասուվան-Դաջի գյուղ և կրակ բացել բնակիչների ուղղությամբ։ Ըստ Նիգերի ոստիկանության ներկայացուցի Վասիու Աբիոդունի հայտարարության, նրանք նաև ավերել են տեղի շուկան և մի քանի տուն։

Առնվազն երկու տեղացի հայտնել է 37 զոհի մասին և նշել, որ այդ թիվը կարող է շատ ավելի մեծ լինել. կիրակի օրվա դրությամբ որոշ մարդիկ համարվում էին անհետ կորած։

Բնակիչները նաև հայտնել են, որ անվտանգության ուժերը դեռ չեն ժամանել այդ տարածք, ինչը հակասում է ոստիկանության հայտարարությանը, թե իրենք աշխատակիցներ են ուղարկել առևանգվածներին որոնելու համար։ Կաթոլիկ եկեղեցու Կոնտագորայի թեմի ներկայացուցիչ հայր Ստեֆան Կաբիրատը տեղական լրատվամիջոցներին ասել է, որ զինյալները սպանել են ավելի քան 40 մարդու, և որ առևանգվածների թվում երեխաներ կան։

Ըստ մի տեղաբնակի, որը խնդրել է չհրապարակել իր անունը՝ անվտանգության նկատառումներից ելնելով, զինյալները հարձակումից մոտ մեկ շաբաթ առաջ թաքնվել էին հարևան բնակավայրերում։

Նման հարձակումները սովորական են Աֆրիկայի ամենախիտ բնակեցված երկրում՝ Նիգերիայում, որտեղ վերահսկողություն հաստատելու ձգտող տասնյակ հանցախմբեր հաճախ հարձակվում են հեռավոր բնակավայրերի վրա, որտեղ անվտանգության ուժերն ու կառավարության ներկայությունը սահմանափակ են։

Կասուվան-Դաջի գյուղի վրա շաբաթ օրը կատարված հարձակումը տեղի է ունեցել Պապիրի համայնքի մոտակայքում, որտեղ նոյեմբերին կաթոլիկ դպրոցից ավելի քան 300 աշակերտ և նրանց ուսուցիչներն էին առևանգվել։