Ադրբեջանի նախագահ Իլհամ Ալիևը հունվարի 4-ին ընդունել է ԱՄՆ պատվիրակությանը, հայտնում են ադրբեջանական լրատվամիջոցները։

Ըստ ադրբեջանական լրատվամիջոցների, պատվիրակության կազմում են սենատոր, Սենատի զինված ուժերի հարցերով հանձնաժողովի անդամ, հանրապետական Մարկվեյն Մալինը (Օկլահոմա), Ներկայացուցիչների պալատի անդամ և եկամուտների հարցերով հանձնաժողովի նախագահ, հանրապետական Ջեյսոն Սմիթը (Միսուրի), Ներկայացուցիչների պալատի զինված ուժերի և եկամուտների հարցերով հանձնաժողովների անդամ, հանրապետական Ռոնի Ջեքսոնը (Տեխաս) և Ներկայացուցիչների պալատի եկամուտների հարցերով հանձնաժողովի անդամ, դեմոկրատ Ջիմի Պանետան (Կալիֆորնիա)։

Ալիևը նրանց հայտնել է, որ Ադրբեջանի և Հայաստանի միջև արդեն առևտրային հարաբերություններ են հաստատվել։ Ընդգծելով «ձեռք բերված պայմանավորվածությունների պատմական նշանակությունը»՝ Ալիևը հատուկ շեշտել է ԱՄՆ նախագահ Դոնալդ Թրամփի դերն այդ հարցում։

Ադրբեջանի նախագահը հայտարարել է, որ իր երկիրը կշարունակի տարածաշրջանային խաղաղության օրակարգի առաջմղմանն ուղղված ջանքերը։ Նա պատմել է Հայաստան ադրբեջանական նավթամթերքի արտահանման, ինչպես նաև Ադրբեջանի տարածքով Ղազախստանից ու Ռուսաստանից Հայաստան ցորենի մատակարարումների մասին։

Ադրբեջանի նախագահը նաև դժգոհություն է հայտնել «Ազատության աջակցության ակտի» 907-րդ ուղղման վերաբերյալ։

«Բարձր գնահատելով ԱՄՆ նախագահ Դոնալդ Թրամփի կողմից այդ ուղղման գործողության կասեցումը՝ նախագահ Իլհամ Ալիևը հույս է հայտնել, որ Կոնգրեսի անդամները կշարունակեն ջանքերը դրա լիակատար չեղարկման ուղղությամբ»,- գրում են ադրբեջանական լրատվամիջոցները։