Գերմանական հետախուզական խումբը, որն ուրբաթ ժամանել էր Գրենլանդիա, լքում է Դանիայի տարածքը՝ ինչպես և նախատեսված էր, հայտնում է DW-ն։

Տասնհինգ զինծառայողներ կիրակի կեսօրին արկտիկական կղզուց քաղաքացիական չվերթով մեկնել են Կոպենհագեն։

Նշվում է, որ տեղակայումն ի սկզբանե նախատեսված էր մի քանի օրով և իրականացվել է Դանիայի խնդրանքով։

Խումբը պետք է գնահատեր ՆԱՏՕ-ի հնարավոր զորավարժությունների պայմանները. կառավարման հրամանատարական կենտրոնի ներկայացուցիչը կիրակի հայտարարել է, որ առաքելությունն ավարտված է։

Ավելի վաղ ԱՄՆ նախագահ Դոնալդ Թրամփը սպառնացել էր նոր մաքսատուրքեր սահմանել առաքելությանը մասնակցող ութ երկրների համար։ Թրամփը պնդում է, որ անվտանգության նկատառումներով Գրենլանդիան պետք է պատկանի Միացյալ Նահանգներին՝ վկայակոչելով Չինաստանից և Ռուսաստանից բխող սպառնալիքները։

ՆԱՏՕ-ի եվրոպացի դաշնակիցները մերժում են այդ գաղափարը՝ հայտարարելով, որ դաշինքը կարող է հավաքական ուժերով պաշտպանել Արկտիկան։

Ավելի վաղ մի շարք լրատվամիջոցներ հայտնել էին, թե Գերմանիայի զորքերը ժամկետից շուտ են հեռացել Գրենլանդիայից։