Աբու Դաբիում մեկնարկել են Ռուսաստանի, Միացյալ Նահանգների և Ուկրաինայի միջև եռակողմ բանակցությունները, հաստատել է Արաբական Միացյալ Էմիրությունների արտգործնախարար Աբդուլլահ բին Զայեդ Ալ Նահյանը։ Նա նշել է, որ հանդիպումը կտևի երկու օր և նպատակ ունի ամրապնդել երկխոսությունը և ճգնաժամի քաղաքական լուծումներ գտնել։

Անվտանգության հարցերով աշխատանքային խմբի առաջին հանդիպումը տեղի կունենա հունվարի 23-ին։ Ըստ Ռուսաստանի նախագահի մամուլի քարտուղար Դմիտրի Պեսկովի՝ Մոսկվան մանրակրկիտ նախապատրաստվել է Կիևի և Վաշինգտոնի հետ բանակցություններին։ Ռուսական պատվիրակությունը գլխավորում է Գլխավոր շտաբի գլխավոր վարչության պետ Իգոր Կոստյուկովը, խմբում ընդգրկված են նաև Ռուսաստանի պաշտպանության նախարարության ներկայացուցիչներ։

Ուկրաինական պատվիրակությունը ներկայացնում են Ուկրաինայի ազգային անվտանգության և պաշտպանության խորհրդի քարտուղար և պատվիրակության ղեկավար Ռուստեմ Ումերովը, Ուկրաինայի նախագահի աշխատակազմի ղեկավար Կիրիլ Բուդանովը, Ուկրաինայի խորհրդարանի անդամ Դավիթ Արախամիան և այլք։

Ավելի վաղ լրատվամիջոցները հայտնել էին, որ Մոսկվան քննարկում է այսպես կոչված «Անկորաժի բանաձևը», որը 2025 թվականի օգոստոսին Աբու Դաբիում Ուկրաինայի և ԱՄՆ-ի հետ եռակողմ բանակցությունների ժամանակ համաձայնեցրել են Ռուսաստանի և ԱՄՆ նախագահներ Վլադիմիր Պուտինը և Դոնալդ Թրամփը։ Բանաձևը նախատեսում է Ռուսաստանի վերահսկողությունը Դոնբասի ամբողջ տարածքի նկատմամբ և ներկայիս առաջնագծի սառեցում մյուս մարզերում։