ԱՄՆ հատուկ բանագնացներ Սթիվ Ուիթքոֆը և Ջարեդ Քուշները շաբաթ օրը եղել են Իսրայելում՝ վարչապետ Բենիամին Նեթանյահուի հետ հանդիպելու համար։ Հանդիպման հիմնական նպատակը Գազայի հատվածում տիրող իրավիճակի քննարկումն է, հայտնում է Reuters-ը՝ հղում անելով տեղեկացված աղբյուրներին։
Հինգշաբթի ԱՄՆ-ն հայտարարել էր «Նոր Գազա» ստեղծելու ծրագրերի մասին, որը պետք է հիմնովին վերակառուցվի՝ ներառելով բնակելի աշտարակներ, տվյալների մշակման կենտրոններ և ծովափնյա հանգստավայրեր: Սա նախագահ Դոնալդ Թրամփի ջանքերի մի մասն է՝ ուղղված Իսրայելի և ՀԱՄԱՍ-ի միջև հրադադարի հաստատմանը, որը պարբերաբար խախտվում է։
Գազայի ժամանակավոր կառավարման պաղեստինյան անցումային հանձնաժողովի ղեկավար Ալի Շաաթը հինգշաբթի հայտարարել է, որ Ռաֆահի անցակետը, որը գրեթե 2 միլիոն բնակչության համար Գազա մտնելու կամ այնտեղից դուրս գալու միակ ճանապարհն է, կբացվի հաջորդ շաբաթ:
Ըստ հարցին իրազեկ երեք աղբյուրների, սահմանի սպասվող բացման նախաշեմին Իսրայելը ցանկանում է սահմանափակել Եգիպտոսի հետ անցակետով Գազա մտնող պաղեստինցիների թիվը՝ երաշխավորելու համար, որ դուրս եկողներն ավելի շատ կլինեն, քան ներս մտնողները։
Ենթադրվում էր, որ սահմանը պետք է բացվեր պատերազմի դադարեցման վերաբերյալ Թրամփի ծրագրի սկզբնական փուլում՝ համաձայն Իսրայելի և ՀԱՄԱՍ-ի միջև հոկտեմբերին ձեռք բերված հրադադարի համաձայնագրի։
Ըստ Գազայի առողջապահության նախարարության շաբաթ օրը հրապարակած տվյալների, 2023 թվականի հոկտեմբերի 7-ից ի վեր Գազայում զոհերի թիվն արդեն 71,654 է, իսկ հոկտեմբերյան հրադադարից հետո զոհվել է 481 մարդ։
Ավելի վաղ Վաշինգտոնը հայտարարել էր, որ ծրագիրն անցել է երկրորդ փուլին, որի համաձայն ակնկալվում է, որ Իսրայելը դուրս կբերի զորքերը Գազայի հատվածից, իսկ ՀԱՄԱՍ-ը կհանձնի տարածքի վարչական վերահսկողությունը:
Նախընտրելի
