«Կանադան սիստեմատիկորեն կործանում է ինքն իրեն»,— Truth Social սոցիալական ցանցում գրել է ԱՄՆ նախագահ Դոնալդ Թրամփը։

«Չինաստանի հետ գործարքը նրանց համար աղետ է։ Այն պատմության մեջ կմտնի որպես պատմության վատթարագույն գործարքներից մեկը։ Նրանց բոլոր ձեռնարկությունները տեղափոխվում են ԱՄՆ։ Ես ուզում եմ, որ Կանադան ՈՂՋ ՄՆԱ ԵՎ ԲԱՐԳԱՎԱՃԻ՛»,— նշել է Թրամփը։

Մեկ այլ հրապարակման մեջ ԱՄՆ նախագահը գրել է, որ Չինաստանը «հաջողությամբ և անսահմանափակ կերպով զավթում է երբեմնի հզոր երկիր Կանադան»։

«Այնքան տխուր է տեսնել, թե ինչպես է դա տեղի ունենում։ Ես միայն հույս ունեմ, որ նրանք հանգիստ կթողնեն հոկեյը»,— նշել է նա։

Հիշեցնենք, որ վերջերս Կանադայի վարչապետ Մարկ Քարնին այցելել էր Չինաստան, որտեղ կողմերը քննարկել էին երկկողմ առևտրի ընդլայնումը և չինական էլեկտրական մեքենաների մաքսատուրքերի նվազեցումը, ինչը զգալի քայլ էր տնտեսական կապերի ամրապնդման ճանապարհին։

Դավոսում Համաշխարհային տնտեսական ֆորումի ժամանակ Կանադայի վարչապետը հանդես է եկել կտրուկ ելույթով՝ հայտարարելով, որ միջազգային կանոնների նախկին համակարգն այլևս չի կատարում իր գործառույթը և չի ապահովում ո՛չ կանխատեսելիություն, ո՛չ անվտանգություն։

«Մեզ ավելի ու ավելի հաճախ են հիշեցնում, որ մենք ապրում ենք մեծ տերությունների մրցակցության դարաշրջանում,— ասել է Քարնին։— Կանոնները, որոնք ժամանակին սահմանափակում էին ուժը, այժմ լղոզվում են։ Հզորներն անում են այն, ինչ կարող են, իսկ թույլերը ստիպված են հանդուրժել այն, ինչ իրենց պարտադրում են»։

ԱՄՆ նախագահ Դոնալդ Թրամփը Դավոսում իր ելույթի ընթացքում արձագանքել է կանադացի գործընկերոջ ելույթին՝ հայտարարելով, որ «Կանադան ապրում է ԱՄՆ-ի շնորհիվ» և պնդել, որ Օտտավան պետք է երախտապարտ լինի Վաշինգտոնին, սակայն Կանադայի վարչապետը, իր կարծիքով, այնքան էլ երախտապարտ չէ։