ԱՄՆ պաշտպանության նախարար Փիթ Հեգսեթը, ըստ ամենայնի, չի մասնակցի Բրյուսելում հաջորդ ամիս անցկացվելիք ՆԱՏՕ-ի պաշտպանության նախարարների հանդիպմանը, հաղորդում է Reuters-ը՝ հղում անելով աղբյուրներին։

Սա երկրորդ դեպքն է, երբ ԱՄՆ նախագահ Դոնալդ Թրամփի վարչակազմի ներկայացուցիչը բաց  է թողնում ռազմական դաշինքի հանդիպումը։

Աղբյուրները՝ ամերիկացի պաշտոնյան և ՆԱՏՕ-ի դիվանագետը, հայտնել են, որ Հեգսեթը բաց կթողնի հանդիպումը, որը տեղի կունենա փետրվարի 12-ին ՆԱՏՕ-ի կենտրոնակայանում։

Միևնույն ժամանակ, ԱՄՆ պետքարտուղար Մարկո Ռուբիոն չի մասնակցել դեկտեմբերին ՆԱՏՕ-ի անդամ երկրների արտգործնախարարների վերջին հանդիպմանը։

Վաշինգտոնը հայտարարել է, որ ԱՄՆ-ը շարունակում է հավատարիմ մնալ ՆԱՏՕ-ին։ Սակայն դաշինքը լարվածություն է ապրում Թրամփի և նրա եվրոպացի դաշնակիցների միջև, մասնավորապես վերջերս՝ ՆԱՏՕ-ի անդամ Դանիային պատկանող կիսաինքնավար տարածք Գրենլանդիան ձեռք բերելու նրա ցանկության պատճառով։ Ճգնաժամը կարգավորվել է, գոնե առայժմ, երբ Թրամփն անցյալ շաբաթ Դավոսում բանակցություններ վարեց ՆԱՏՕ-ի գլխավոր քարտուղար Մարկ Ռյուտեի հետ։

Ռյուտեն ասել է, որ առաջնորդները համաձայնության են եկել, որ Միացյալ Նահանգների, Դանիայի և Գրենլանդիայի պաշտոնյաները կանցկացնեն եռակողմ բանակցություններ, և որ ՆԱՏՕ-ն ավելի ակտիվ դեր կխաղա Արկտիկայի անվտանգության հարցում։