Ռուսաստանի նախագահ Վլադիմիր Պուտինը հայտարարել է, որ Ուկրաինայի հակամարտությունն Արևմուտքի երկրների սխալն է։ Այս մասին նախագահն ասել է «Вести»-ի հեղինակ Պավել Զարուբինին, հայտնում է «Коммерсантъ»-ը։

«Կարելի է ասել, որ այն ամենը, ինչ այժմ տեղի է ունենում, անկասկած սխալ է՝ նախևառաջ արևմտյան երկրների սխալը։ Համակարգային սխալ»,— ասել է Վլադիմիր Պուտինը։

Ըստ նրա, «ուկրաինական ճգնաժամն» առաջացել է Ուկրաինայում պետական հեղաշրջմանն արևմտյան երկրների ցուցաբերած աջակցության պատճառով, որին հաջորդել են «ղրիմյան իրադարձությունները, իսկ հետո նաև Ուկրաինայի հարավ-արևելքում, ընդհանուր առմամբ՝ Դոնբասում, Նովոռոսիան»։

Այսօր ՌԴ նախագահի մամուլի քարտուղար Դմիտրի Պեսկովը հայտարարել է, որ Ռուսաստանի և Ուկրաինայի միջև բանակցությունների հաջող ավարտի համար Ուկրաինայում «ինչ-որ մեկը պետք է պատասխանատվություն ստանձնի» և անհրաժեշտ որոշումներ կայացնի։ Ըստ Դմիտրի Պեսկովի, «ըստ ամենայնի» դա պետք է լինի Ուկրաինայի նախագահ Վլադիմիր Զելենսկին։