Իրանի ճգնաժամը չի հանգեցնի ցորենի պակասի Ռուսաստանում եւ ԱՊՀ-ում։ Այս կարծիքն է հայտնել տնտեսագիտության դոկտոր, Ռուսաստանի կառավարության գյուղատնտեսության վարչության նախկին ղեկավար Լեոնիդ Խոլոդը Sputnik-ի կազմակերպած Մոսկվա-Երեւան տեսակամրջի ժամանակ։

Մասնագետն ընդգծել է, որ Ռուսաստանը, մասնավորապես, եւ ԱՊՀ-ն ընդհանրապես, ինքնաբավ են հիմնական սննդամթերքի արտադրության առումով։ Սակայն, համաշխարհային ճգնաժամի պայմաններում, այլ երկրներում պահանջարկը մեծանում է, ինչը նշանակում է, որ արտահանողներն ու արտադրողները գայթակղվում են արտահանել իրենց արտադրանքը եւ վաճառել այն ավելի բարձր գնով։

Լեոնիդ Խոլոդը նշել է, որ Ռուսաստանը պարարտանյութերի առաջատար արտահանողն է։ Եթե Իրանի ճգնաժամը շարունակվի եւ Հորմուզի նեղուցը չբացվի վեց ամսից մինչեւ մեկ տարվա ընթացքում, պարարտանյութերի գները կբարձրանան, եթե, իհարկե, գները չկարգավորվեն։ Ռուսաստանը նաեւ ցորենի թիվ մեկ մատակարարն է։ Համապատասխանաբար, ցորենի պահանջարկը նույնպես կաճի։ Նրա խոսքով՝ Ռուսաստանն այս տարի ներուժ ունի, բայց եթե գները չկարգավորվեն, դրանք կբարձրանան։ «Մենք պետք է ապահովենք, որ բավարար պաշարներ լինեն Ռուսաստանի եւ նրա մերձավոր դաշնակիցների, ընկերների համար։ Սակայն Ռուսաստանի եւ ընդհանուր առմամբ ԱՊՀ դերը աշխարհաքաղաքական, տնտեսական եւ գյուղատնտեսական առումներով կտրուկ աճում է։ Նույնը վերաբերում է գազին եւ նավթին։ Ածխաջրածինների պահանջարկը կաճի»,- նշել է փորձագետը։

Պատասխանելով այս տարվա բերքահավաքի հեռանկարների մասին հարցին՝ Լեոնիդ Խոլոդը նշել է, որ 2025թ․ բերքահավաքը լավն էր, այս տարվա բերքահավաքը մոտավորապես նույնը կլինի։ «Ձմեռային բերքը վատ չէ։ Դա ցորենի 70 տոկոսն է։ Գարնանային բերքը՝ ինչպես Աստված տնօրինի։ Կլիման փոխվում է։ Կարծում եմ, որ բերքահավաքն ընդհանուր առմամբ նման կլինի 2025թ․ բերքահավաքին՝ 145-150 միլիոն տոննայի սահմաններում, արտահանման նույն ներուժով։ Համագործակցության շրջանակում հացահատիկ կա եւ կլինի։ Հիշեցնեմ, որ Ղազախստանը եւ մի փոքր էլ Բելառուսը նույնպես ցորեն են արտադրում։ Եթե այլ բան չպատահի, որովհետեւ «մարդը որոշում է, բայց Աստված է տնօրինում»,- ավելացրել է Լեոնիդ Խոլոդը։