ԱՄՆ նախագահ Դոնալդ Թրամփը սպառնացել է եվրոպացի դաշնակիցներին, որ կդադարեցնի Ուկրաինային զենքի մատակարարումը՝ նրանց ստիպելու համար միանալ Հորմուզի նեղուցի պաշտպանությանը, ապրիլի 1-ին հաղորդել է բրիտանական Financial Times թերթը՝ հղում անելով աղբյուրներին։

Թրամփը մարտին պահանջեց, որ ՆԱՏՕ-ի ռազմածովային ուժերն ԱՄՆ-ին օգնեն վերաբացելու Հորմուզի նեղուցով նավագնացությունը, որը փակ էր Իրանի հետ ԱՄՆ-Իսրայել պատերազմի սկսվելուց ի վեր։ Եվրոպական երկրները հրաժարվեցին, որից հետո Թրամփը սպառնաց դուրս գալ PURL ծրագրից՝ ՆԱՏՕ-ի նախաձեռնությունից, որը նախատեսված է Ուկրաինային ամերիկյան զենք գնելու համար՝ եվրոպական երկրների ֆինանսավորմամբ։

Կարճ ժամանակ անց ՆԱՏՕ-ի գլխավոր քարտուղար Մարկ Ռյուտեն հասավ նրան, որ մարտի 19-ին դաշինքի հիմնական երկրները՝ Ֆրանսիան, Գերմանիան և Մեծ Բրիտանիան հանդես եկան համատեղ հայտարարությամբ, որում ասվում էր Հորմուզի նեղուցով անվտանգ անցումն ապահովելու իրենց պատրաստակամության մասին։

Մի պաշտոնյա FT-ին ասել է. «Հենց Ռյուտեն էր պնդում համատեղ հայտարարության վրա, քանի որ Թրամփը սպառնում էր դուրս գալ PURL-ից և ընդհանրապես դադարեցնել Ուկրաինային աջակցելը»։ Ըստ երկու աղբյուրի՝ Ռյուտեն հայտարարության հրապարակումից երկու օր առաջ մի քանի հեռախոսազրույց է ունեցել Թրամփի և ԱՄՆ պետքարտուղար Մարկո Ռուբիոյի հետ։ Մեկ այլ աղբյուր հայտնել է, որ Ֆրանսիայի, Գերմանիայի և Մեծ Բրիտանիայի ներկայացուցիչների հետ հեռախոսազրույցի ժամանակ Մարկ Ռյուտեն նշել է, որ Թրամփը զայրացած է Հորմուզի նեղուցի պաշտպանությանն օգնելուց եվրոպացիների հրաժարման պատճառով։