Մենք թույլ չենք տա Իրանին փող աշխատել նավթը վաճառելով նրանց, ում իրենք են ուզում, կամ հրաժարվելով վաճառել նրանց, ում չեն ուզում։ Կլինի կամ ամեն ինչ, կամ ոչինչ։ Այս մասին հայտարարել է ԱՄՆ նախագահ Դոնալդ Թրամփը։

«Տեսաք, թե ինչ արեցինք Վենեսուելայի հետ։ Սա կլինի շատ նման մի բան, բայց ավելի բարձր մակարդակով։ Մենք պատրաստվում ենք շրջափակել Հորմուզի նեղուցն Իրանի համար. դա որոշ ժամանակ կխլի, բայց բավականին շուտով իր պտուղները կտա։ Նրանք եկել էին այնպես, կարծես բոլոր հաղթաթղթերն իրենց ձեռքում են, բայց իրականում այդպես չէ»,- հավելել է Թրամփը։

Ըստ նրա, այն մարդիկ, որոնց հետ ԱՄՆ-ն երեկ գործ է ունեցել, անկեղծ ասած, շատ խելացի էին, շատ խորաթափանց ու շատ լավը։

«Ինչպես ասել է Բիբի Նեթանյահուն, մենք ավագ եղբայրն ենք, իսկ նրանք՝ կրտսերը»,- նշել է Թրամփը։

Ըստ նրա, ՆԱՏՕ-ի երկրներն ասում են, որ ցանկանում են գալ և օգնել նեղուցն ականազերծելու հարցում, և դա շատ ժամանակ չի խլի։

«Որքան հասկանում եմ, Միացյալ Թագավորությունը և ևս մի քանի երկիր ականազերծող նավեր են ուղարկում։ Մենք անօդաչու թռչող սարքերի ոչնչացման նոր սարքավորումներ ունենք՝ այսպես կոչված համակարգչայնացված փամփուշտներ։ Կան նաև լազերներ, որոնք հալեցնում են անօդաչուները։ Դա հրաշալի տեսարան է»,- եզրափակել է Թրամփը։