Հունգարիայում ավարտվել է քվեարկությունը. ի՞նչ կարող է փոխվել, եթե Օրբանը պարտվի

Հունգարիայում ավարտվել է խորհրդարանական ընտրությունների քվեարկությունը։ Այս մասին հայտնում է Reuters-ը։

Երկրում փակվում են ընտրատեղամասերը, և սկսվում է ձայների հաշվարկը։

Գործող վարչապետ Վիկտոր Օրբանը, որը սերտ կապեր է պահպանել Կրեմլի հետ, Եվրոպայում աջ պոպուլիստական շարժումների շարժիչ ուժն էր և Բրյուսելում խորը տարաձայնություններ առաջացնող գործիչ։

Սպասվում է, որ նրա մրցակից Պետեր Մադյարը վարչապետ դառնալու դեպքում ավելի կառուցողական դիրքորոշում կորդեգրի ԵՄ-ի և ՆԱՏՕ-ի նկատմամբ, թեև, ըստ վերլուծաբանների, նա դժվար թե շեղվի Օրբանի դիրքորոշումից այնպիսի առանցքային հարցերում, ինչպիսին է միգրացիան։

Նա խոստացել է վճռական քայլեր ձեռնարկել կոռուպցիայի դեմ պայքարում և հայտարարել է, որ Հունգարիան կմիանա ԵՄ դատախազությանը, ինչն Օրբանը մերժել էր։

Պատասխանելով Ռուսաստանի նկատմամբ իր մոտեցման մասին հարցին՝ Մադյարը հայտարարել է, որ կգործի «պրագմատիկ»։

Մադյարը հայտարարել է նաև, որ կձգտի վարչապետի պաշտոնավարումը սահմանափակել երկու ժամկետով և կնվազեցնի պետության միջամտությունը տնտեսությանը։