Մեծ Բրիտանիան չի մասնակցի Հորմուզի նեղուցի ամերիկյան շրջափակմանը, հայտնում է Sky News-ը։

Սա տեղի է ունեցել այն բանից հետո, երբ ԱՄՆ նախագահ Դոնալդ Թրամփը հայտարարել է, որ ԱՄՆ ռազմածովային ուժերը կփակեն այս կարևորագույն նավարկման երթուղին։

Կառավարության ներկայացուցիչը հայտարարել է. «Մենք շարունակում ենք աջակցել նավագնացության ազատությանը և Հորմուզի նեղուցի բաց լինելուն, ինչը խիստ անհրաժեշտ է համաշխարհային տնտեսության կայունության և երկրում կյանքի արժեքի նվազեցման համար։ Հորմուզի նեղուցով անցնելու համար վճար գանձելն անթույլատրելի է։ Մենք աշխատում ենք Ֆրանսիայի և այլ գործընկերների հետ՝ նավագնացության ազատությունը պաշտպանելու համար լայն կոալիցիա ստեղծելու ուղղությամբ»։

Ավելի վաղ Թրամփը հայտարարել էր, թե Մեծ Բրիտանիան ականազերծող նավեր է ուղարկում՝ նեղուցի մաքրմանն օգնելու համար։

Ըստ եղած տեղեկությունների, Մեծ Բրիտանիան արդեն իսկ այդ տարածաշրջանում ունի ականների որոնման համակարգեր։