նախընտրելի դարձնել
ԱՄՆ պետքարտուղար Մարկո Ռուբիոն երեքշաբթի օրը կմասնակցի Իսրայելի և Լիբանանի միջև ուղիղ բանակցություններին, հաղորդում է CNN-ը՝ հղում անելով Պետդեպարտամենտի պաշտոնյային։
Պաշտոնյայի խոսքով՝ Լիբանանում ԱՄՆ դեսպան Միշել Իսան և Պետդեպարտամենտի խորհրդական Մայքլ Նիդհեմը նույնպես կլինեն բանակցություններին մասնակցող ԱՄՆ պատվիրակության կազմում։
Իսրայելի և Լիբանանի պատվիրակությունները կգլխավորեն համապատասխանաբար նրանց դեսպաններ Եչիել Լեյթերը և Նադա Համադե Մոավադը։
«Այս զրույցը կշարունակի երկխոսությունը այն մասին, թե ինչպես ապահովել Իսրայելի հյուսիսային սահմանի երկարաժամկետ անվտանգությունը և աջակցել Լիբանանի կառավարության վճռականությանը՝ վերականգնելու իր տարածքի և քաղաքական կյանքի նկատմամբ լիակատար ինքնիշխանությունը», - ասել է պաշտոնյան։
«Իսրայելը պատերազմի մեջ է Հեզբոլլահի հետ, այլ ոչ թե Լիբանանի, ուստի չկա որևէ պատճառ, որ երկու հարևանները չխոսեն», - հավելել է նա։
Լիբանանի և Իսրայելի միջև բանակցությունները նախատեսված են երեքշաբթի օրը Վաշինգտոնում։ Ավելի վաղ Լիբանանի նախագահ Ջոզեֆ Աունը հայտարարել էր, որ բանակցությունները «Լիբանանի պատասխանատվությունն են, այլ ոչ թե որևէ այլ կողմի»։
Մինչդեռ, լիբանանյան արմատական «Հեզբոլլահ» շարժումը Լիբանանի և Իսրայելի միջև բանակցությունները համարում է «անօգուտ» և դեմ է դրանց։
