Իրանի նախագահ Մասուդ Փեզեշքիանը խստորեն քննադատել է ԱՄՆ-ի քաղաքականությունն ու միջազգային հանրության երկակի ստանդարտները, հայտնում է ИРНА-ն:

Ելույթ ունենալով Սպորտի և երիտասարդության հարցերի նախարարությունում՝ երկրի ղեկավարը կասկածի տակ է դրել Իրանի միջուկային ծրագրի նկատմամբ ամերիկյան ճնշումների օրինականությունը։ Փեզեշքիանն ուղղակիորեն հարցրել է. «Ո՞վ է ԱՄՆ նախագահն աշխարհի մասշտաբով, որ մի ազգի զրկի իր օրինական իրավունքներից»։

Նա ընդգծել է, որ յուրաքանչյուր մարդ, անկախ կրոնից կամ ռասայից, պետք է հասանելիություն ունենա իր անօտարելի իրավունքներին, և կոչ է արել արդարություն հաստատել միջազգային հարաբերություններում։

Փեզեշքիանը շեշտել է, որ Իրանը խաղաղասեր երկիր է։ «Մենք պատերազմի չենք ձգտում։ Այն, ինչ մենք անում ենք, օրինական ինքնապաշտպանություն է։ Ցանկացած մարդ և ցանկացած ազգ կպաշտպանվի հարձակման դեպքում»,- հայտարարել է նա։

Իրանի նախագահը նաև քննադատել է ՄԱԿ-ին և իրավապաշտպան կազմակերպություններին տարածաշրջանում Իսրայելի և ԱՄՆ-ի գործողությունների ֆոնին նրանց լռության համար։ Ըստ նրա, այդ կառույցները «քնած են» կամ սահմանափակվում են ձևական անհանգստությամբ, մինչդեռ խաղաղ բնակիչներ, կանայք և երեխաներ են զոհվում։