նախընտրելի դարձնելԸստ ՀՀ Ազգային վիճակագրական ծառայության հրապարակման` 2012 թ. հունվար-փետրվարին Հայաստանում արտադրվել է 1.7 հազ. լիտր շամպայն, ինչը 16 անգամ զիջում է 2011 թ. համապատասխան ժամանակաշրջանի ցուցանիշը:
Նշենք, որ Հայաստանում շամպայնների արտադրությամբ զբաղվում է միայն մեկ ընկերություն` «Երեւանի շամպայն-գինիների գործարան»: ԲԲԸ-ն: Ըստ ընկերության կայքէջի` արտադրում են շամպայնի ողջ տեսականին` դասականից մինչեւ հավաքածու, կիրառում են արտադրության ֆրանսիական տեխնոլոգիա:
Մեր հեռախոսազանգին ի պատասխան` ընկերության ներկայացուցիչը (Հերմինե) զարմացավ, որ շամպայնների արտադրությունը 16 անգամ նվազեցրել են: «Եւ արտադրում ենք, եւ արտահանում»,- նշեց գործարանի ներկայացուցիչը: Իսկ ընկերության գլխավոր հաշվապահ Հովհաննես Իսկաջյանը նշեց, որ դեկտեմբերին մեծ քանակով առաքում են ունեցել, ու շուկայում այդ խմբաքանակները դեռ սպառված չեն, ուստի առաջին եռամսյակում առաքում չեն իրականացրել: «Շամպայն արտադրում ենք ըստ պահանջի, այնպես չի, որ արտադրենք ու տարիներով մնա պահեստում»,- ասաց Հ. Իսկաջյանը: Այնուամենայնիվ նա նշեց, որ առաջին եռամսյակում արտադրություն եղել է, քանի որ նաեւ արտահանում ունեն:
