Կառավարությունում տեղի է ունեցել ՀՀ վարչապետին կից կանանց հարցերով խորհրդի նիստ, որը վարել է վարչապետ, խորհրդի նախագահ Տիգրան Սարգսյանը։
Կառավարության մամուլի ծառայությունից հայտնում են, թե օրակարգի առաջին հարցով ներկայացվել են կանանց քաղաքական մասնակցության եւ ընդգրկվածության հիմնական ցուցանիշներն ու կառավարչական հմտությունների բարելավման առկա խնդիրները: Նշվել է, որ 2012 թվականին հանրապետությունում կայացած տեղական ինքնակառավարման մարմինների ընտրություններից առաջ կանանց համար կազմակերպվել են ընտրական գործընթացների վերաբերյալ սեմինարներ, որոնց մասնակցել է 325 կին: Նրանցից յուրաքանչյուր երկրորդն առաջադրել է իր թեկնածությունը ՏԻՄ ընտրություններին, որոնց 64 տոկոսն ընտրվել է ավագանի: Տեղեկացվել է, որ ՏԻՄ նախորդ ընտրությունների համեմատ հանրապետությունում 2,2 տոկոսով ավելացել է կին ավագանիների թիվը:
Ընտրություններին առաջադրված կանանց ընտրվելու ամենաբարձր ցուցանիշն արձանագրվել է Սյունիքի մարզում, որտեղ ընտրվել է առաջադրվածներից 17,4 տոկոսը, Լոռու մարզում այդ ցուցանիշը կազմում է 12,5 տոկոս, Տավուշում՝ 9,3, Արմավիրում՝ 8,7: Մյուս մարզերում արձանագրվել են համեմատաբար ցածր ցուցանիշներ:
Այնուհետեւ խորհրդին է ներկայացվել կանանց նկատմամբ խտրականության բոլոր ձեւերի վերացման մասին ՄԱԿ-ի կոնվենցիայի համաձայն ներկայացվելիք 5-րդ եւ 6-րդ պարբերական զեկույցների նախապատրաստման ընթացքն ու առկա խնդիրները, գենդերային հավասարության ազգային մեխանիզմի կայացման հիմնահարցերը, գենդերային հավասարության ազգային մեխանիզմի վերաբերյալ միջազգային պահանջներին համապատասխան կանանց խորհրդի ձեւափոխման հիմնախնդիրները:
Քննարկվել են նաեւ «Լավագույն համայնքապետ՝ գենդերային խնդիրների լուծման ուղղությամբ» եւ «Լավագույն կին-գործարար» ՀՀ վարչապետի 2013 թվականի մրցանակաբաշխություններին առնչվող հարցեր: Անդրադարձ է կատարվել ձերբակալվածին պահելու վայրերում եւ կալանավայրերում կանանց խնդիրներին: Վերջին հարցի կապակցությամբ վարչապետ Սարգսյանը հանձնարարել է ստեղծել համապատասխան գերատեսչությունների ներկայացուցիչներից բաղկացած աշխատանքային խումբ, որը կքննարկի առկա բացթողումներն ու կներկայացնի համապատասխան առաջարկություններ:
Նիստի ավարտին վարչապետը ՀՀ կառավարության եւ անձամբ իր անունից շնորհավորել է ներկաներին գալիք Ամանորի եւ Սուրբ ծննդյան տոների կապակցությամբ եւ նշել. «Ցանկանում եմ բոլորիդ կանացի երջանկություն, սեր եւ համերաշխություն: Թող 2013 թվականը ձեր օջախներին բերի միայն ուրախություն եւ, որ ժպիտը միշտ լինի ձեր դեմքին»:
