ԼՂՀ Պաշտպանության բանակի հյուսիսային (Գյուլիստան) ուղղությամբ տեղակայված զորամասերից մեկի պահպանության տեղամասի մարտական հենակետում հունիսի 11-ին ժամկետային զինծառայող, 20-ամյա Դերենիկ Մանուկյանի վրա հրազենով կրակել է վերջինիս ամենամոտ ընկերը՝ Վոլոդյա Բաբիկյանը, որն այս պահին ձերբակալված է: Այս մասին NEWS.am-ի հետ զրույցում ասաց Դերենիկի հարեւանուհին՝ տիկին Սուսաննան:

«Դերենիկի շատ մտերիմ ընկերն է եղել Վոլոդյան, դրա համար բոլորն էլ մտածում են, որ պատահական է ստացվել, մտածված չի կրակել: Ասում են՝ իբր զենքը չորացնելիս կայծակ է խփել, Վոլոդյան վախեցել է եւ մատը չգիտես ոնց կպել է ձգանին եւ կրակել ու էդ կրակոցն էլ հենց Դերենիկին է կպել: Դեռեւս այս վարկածն է պտտվում, ուրիշ բան չեն ասում: Նախաքննությունն ամեն ինչ կպարզի»,- ասաց նա:

Հարեւանուհու պատմելով՝ Դերենիկի եղբորը, որը նրա հետ նույն դիրքերում էր ծառայում, սկզբում չեն ասել դեպքի մասին, հրամանատարը տարել է Մարտակերտ, որտեղ էլ հայտնել է լուրը:

«Հրաչիկն էլ չի հասկանում՝ ինչ է կատարվում, ոնց որ օդերում լինի: Հիմա էլ ամեն ինչ անում ենք, որ գոնե Դերենիկի մորը կարողանանք հիվանդանոցից տուն բերել, բայց չգիտենք՝ առողջական վիճակը թույլ կտա, թե ոչ»,- ավելացրեց տիկին Սուսաննան:

Նշենք, որ Դերենիկ Մանուկյանը Երեւանի Նոր Նորքի թաղամասից էր, սովորում էր Երեւանի Խաչատուր Աբովյանի անվան մանկավարժական համալսարանում: 20-ամյա զինծառայողը վեց ամսից զորացրվելու էր:

Հիշեցնենք, որ զինվորի մահվան փաստի առթիվ հարուցվել է քրեական գործ, ձերբակալվել է նրա ծառայակից Վոլոդյա Բաբիկյանը: