Դերասան Վարդան Պետրոսյանի մասնակցությամբ վթարի գործով տուժող Հակոբյանները հերքում են դերասանի ընկերոջ՝ Սարգիս Միքայելյանի հայտարարությունը, թե Ռուբեն Բալոյանն է խոչընդոտել կողմերի միջեւ հաշտության չկայացմանը:
NEWS.am-ի խմբագրություն դիմած Հակոբյանները մասնավորապես ասացին. «Անհեթեթ սուտ է: Ավելին, Ռուբեն Բալոյանն է հրապարակավ 2 անգամ կոչ արել կողմերիս հաշտվելու եւ հարցի լուծման եզրեր գտնելու համար: Ավելին, մեր երկու ընտանիքներին առանձին-առանձին մշտապես նա փորձել է բացատրել հաշտության եզրեր գտնելու անհրաժեշտության մասին:
Այսօր մենք զայրացած ենք, որ հակառակ կողմը ի դեմս Նիկոլայ Բաղդասարյանի՝ հաշտության չգալու պատասխանատվությունը փորձում են բարդել մեր փաստաբանի վրա: Կոչ ենք անում Վարդան Պետրոսյանին եւ նրա փաստաբանին, որ այս բեմադրությանը վերջ տան:
Մեզ ապշեցրեց, որ դատավճռի ընթերցման ժամանակ Վարդան Պետրոսյանը, կրելով մեր եռագույնով շարֆը, հպարտ կանգնած էր եւ կարծես թե Ղարաբաղում 2 թուրք էր սպանել ու դրա համար էր դատապարտվում: Այս է ողջ դատաքննության ընթացքում Վարդան Պետրոսյանի եւ նրա կողմնակիցների վարքագծի հայելին: Մի՞թե սա է մեր մտավորականության իրական դեմքը:
Այս ամենից հետո կարծում ենք՝ ժամանակն է վերջակետ դնել հաշտությանը: Մեր՝ տուժողներիս եւ Վարդան Պետրոսյանի միջեւ հաշտության լինել-չլինելու հարցը մեկընդմիշտ փակված է: Տուժող կողմը շարունակելու է բողոքել Պետրոսյանի խմածության փաստաթղթերում տեղ գտած կեղծիքները վեր հանելու եւ մեր ընտանիքի դժբախտության մեղավորին արդարացի պատիժ տալու համար»:
Նշենք, որ հունվարի 29-ին Կոտայքի մարզի առաջին ատյանի դատարանը Վարդան Պետրոսյանին դատապարտեց ազատազրկման՝ 5 տարի ժամկետով՝ 2 տարով զրկելով մեքենա վարելու իրավունքից: Դատական նիստից հետո Վարդան Պետրոսյանի ընկեր Սարգիս Միքայելյանը լրագրողների հետ զրույցում հայտնեց, որ Հակոբյանների փաստաբանի պատճառով կողմերը չհաշտվեցին:
Ինչպես ավելի վաղ հաղորդել էր NEWS.am-ը, ըստ մեղադրական եզրակացության՝ Վարդան Պետրոսյանը 2013թ. հոկտեմբերի 20-ին, ժամը 22:10–ի սահմաններում, Կոտայքի մարզի Սարալանջ գյուղի կողմից դեպի Երեւան ուղղությամբ վարելիս «ԲՄՎ-320» մակնիշի մեքենայով բախվել է «Վազ 21214» մակնիշի մեքենայի հետնամասին։ Վթարի հետեւանքով «Վազ-21214» մակնիշի մեքենայի ուղեւորներ Էդվարդ եւ Էդգար Հակոբյանները մահացել են, ուղեւորներ Տաթեւիկ Հակոբյանը, Հայկ Հակոբյանը, էմմա Հակոբյանը, ինչպես նաեւ վարորդ Արթուր Հակոբյանն ստացել են վնասվածքներ: