Գյումրեցի 24-ամյա աղջիկը, որին այսօր՝ փետրվարի 8-ին, իրենց տան հյուրասենյակի պահարանից կախված էին գտել, Երևանի Գեղարվեստի պետական ակադեմիայի Գյումրիի մասնաճյուղի ուսանողուհի էր: Աղջկա համակուրսեցիներին պատահածը կասկածելի է թվում, նրանք չեն հավատում, թե նա ինքնասպան է եղել:
«Ինքն ուժեղ կամքի տեր անձնավորություն էր: Այնքան կյանքով լի աղջիկ էր, որ հնարավոր չէ՝ նման բան աներ: Նրա ուրախությունն ու ժպիտն անգամ իր նկարներում էին արտահայտված»,-NEWS.am-ի հետ զրույցում ասաց աղջկա ընկերներուհիներից Արփինե Համբարյանը:
Աղջկա ընկերներից մեկն էլ NEWS.am-ին պատմեց, որ ամեն օր շփվել է նրա հետ, վերջին օրերին պահվածքում փոփոխություն չի նկատել, ավելին՝ աղջիկն իր ապագա պլանների մասին է խոսել. «Մենք ամեն օր շփվում էինք, խոսում դեսից-դենից, նա ամեն անգամ նոր նկար նկարելու մասին էր խոսում, ասում էր՝ ուզում է գունավոր նկարների հատուկ շարք ունենալ: Ես նրա մոտ չեմ նկատել ոչ տրամադրության անկում, ոչ անտարբերություն, վստահ եմ՝ տանն էլ նույն կերպ իրան պահած կլիներ»:
Նշենք, որ աղջկա հայրը մահացած էր, նա մեկ կրտսեր քույր ուներ, որն ամուսնացած է:
Ավելի վաղ NEWS.am-ը հաղորդել էր, որ այսօր՝ փետրվարի 8-ին, Գյումրիի տներից մեկում 24-ամյա աղջկա են գտել իրենց տան հյուրասենյակի պահարանից կախված վիճակում: Նրան առաջինը տեսել է մայրը:
