Գյումրիում ապրիլի 18-ին սպանված հայտնաբերված մայրն ու դուստրը՝71-ամյա Քնարիկ Շահումյանը եւ 50-ամյա Ալվարդ Շահումյանը, մեր տեղեկություններով, Գյումրիում հայտնի էին որպես «տոկոսով» գումար տվողներ:
Գյումրիում NEWS.am-ի թղթակիցը հաղորդում է, որ Մհեր Մկրտչյան 34Ա շենքում այժմ քննչական գործողություններ են կատարվում:
Ոստիկանությունն ահազանգը ստացել է ուշ երեկոյան, առայժմ հայտնի չէ՝ ով է ահազանգել ոստիկանություն:
Հենց նոր դեպքի վայր եկավ Շիրակի մարզի ոստիկանապետ Գրիգոր Ամիրխանյանը:
Ավելի վաղ NEWS.am-ը հայտնել էր, որ մեր տեղեկություններով Գյումրիում սպանություն է տեղի ունեցել: Ըստ նախնական տեղեկությունների, Մհեր Մկրտչյան 34Ա շենքի բնակարաններից մեկում հայտնաբերել են մայր ու աղջկա՝ դանակահարված վիճակում: Թաղամասում տարածված տեղեկությունների համաձայն` տունը տակն ու վրա արված է եղել, ենթադրվում է, որ ավազակային հարձակում է եղել: Շիրակի մարզի դատախազ Րաֆֆի Ասլանյանը մեզ հետ զրույցում ասել էր, որ սպանված հայտնաբերված մոր եւ դստեր վրա դանակի բազմաթիվ հարվածների հետքեր կան:
