Պերուի անվտանգության ուժերն ազատագրել են 54 մարդու, որոնց գերության մեջ էին պահում «Շողացող ուղի» խմբավորման անդամները: Այս մասին գրում է Associated Press-ը:
Նրանցից ոմանց դեռեւս 20-30 տարի առաջ առեւանգել են Պուերտո Օկոպոյից եւ մերձակա այլ քաղաքներից: Երկրի ոստիկանության հակաահաբեկչական բաժնի ղեկավար, գեներալ Խոսե Բաելլայի խոսքով, այն ժամանակ խմբավորումը դեռ ուժեղ էր:
Բացի այդ, ըստ Lenta-ի, գերիների թվում բազմաթիվ երեխաներ եւ պատանիներ են եղել: Բոլորին պահել են Պանգոա գավառի ջունգլիներում: Ազատագրման գործողությունը հնարավոր է դարձել «Շողացող ուղուց» երկու դասալիքների շնորհիվ: Նրանք ոստիկանությանը մատնանշել են ճամբարի վայրը:
Ազատագրվածներն առայժմ չեն շփվում մամուլի հետ: Բաելլայի խոսքով, նրանց բուժօգնություն են ցուցաբերել, հարցաքննել են, ինչից հետո վերադարձրել ընտանիքներին:
