Շահումյան գյուղի Թռչնաբուծական ավանում այսօր` փետրվարի 7-ին, բնակիչներից մեկի անասնագոմից գողացել են մեկ ցլիկ եւ հղի հորթ, հանցագործները անասնագոմից մի քանի մետր հեռավորության վրա մորթել են կենդանիներին եւ մորթին թողել տարածքում: Այս մասին NEWS.am-ի հետ զրույցում ասաց Շահումյանի գյուղապետ Հարություն Նավասարդյանը: Նշելով, որ անասնագոմը պատկանում է Հարությունյանների ընտանիքին, նրա խոսքով, Հարությունյանները զբաղվում են գյուղատնտեսությամբ, նրանք առավոտյան են հայտնաբերել, որ իրենց անասունները չկան:
Նշենք, որ Շահումյան գյուղում սա առաջին դեպքը չէ, մեկ ամիս առաջ գյուղացիներից մեկի անասնագոմից կրկին անասուն են գողացել, սակայն մինչեւ այժմ հանցագործները չեն հայտնաբերվել:
