Հայերը սպասում են, որ Ֆրանցիսկոս պապը հունիսի 24-26-ը Հայաստան կատարելիք այցի ժամանակ կկրկնի Ցեղասպանության մասին խոսքերը: Այս մասին գրում է ֆրանսիական La Croix պարբերականը՝ հավելելով, որ Պապի այցի շրջանակում կլինի նաեւ Հայոց ցեղասպանության թանգարան-ինստիտուտում:
2015 թվականի հոկտեմբերին Թուրքիա այցի ժամանակ Ֆրանցիսկոս պապը ձեռնպահ մնաց այդ խոսքերից, բայց, ի զարմանս շատերի, դրանք նշեց 2015 թվականի ապրիլի 12-ին Վատիկանում պատարագի ժամանակ, որին ներկա էին Հայաստանի նախագահ Սերժ Սարգսյանը, Ամենայն Հայոց Գարեգին 2-րդ կաթողիկոսը (երկրի քրիստոնյաների 85%-ն այս եկեղեցու հետեւորդ են), ինչպես նաեւ Մեծի Տանն Կիլիկիո Արամ 1-ին կաթողիկոսն ու Հայ Կաթողիկե եկեղեցու պատրիարք Գրիգոր Պետրոսը:
«Այդ օրն ինչ-որ պատահեց: Ես տեսա, թե ինչպես էին երկու կաթողիկոսները զսպում արցունքները, տեսա նաեւ Հայաստանի նախագահի զգացմունքները»,- Փարիզում կայացած ասուլիսում պատմեց Սան Կրուա թեմի հոգեւորական Ժոզեֆ Քելեքյանը:
Այդ օրերի եւս մեկ կարեւոր թեմա պետք է դառնա խաղաղությունը: Արնուվիլ լե Գոնեսի Առաքելական եկեղեցու հոգեւորական, հայր Մանուել Հովհաննիսյանի խոսքով, շաբաթ Երեւանի Հանրապետության հրապարակում հանուն խաղաղության աղոթքով էկումենիկ հանդիպմանը 50-60 հազար մարդ կմասնակցի:
