ԱՄՆ Քանզասի նահանգի Մայեթթա քաղաքի դպրոցականները փաստագրական ֆիլմ են պատրաստել ամերիկացի բուժքրոջ մասին, որը Ցեղասպանությունից որբացած հազարավոր հայ երեխաների է փրկել:
Անցյալ տարվա նոյեմբերին մի խումբ աշակերտներ սկսել էին աշխատել փաստագրական ֆիլմի վրա, որը պատմում է քույր Էմմա Քուշմանի մասին, փոխանցում է cjonline-ը: Այն բանից հետո, երբ Օսմանյան կայսրության կառավարությունը սկսում է վռնդել օտարերկրացիներին իր տարածքից, Քուշմանը մնում է Քոնիայի հիվանդանոցում, որտեղ աշխատում էր ավելի քան 10 տարի:
Ցեղասպանության տարիներին Քուշմանը հիվանդանոցը վերածել էր որբանոցի, որտեղ թաքցնում էր երեխաներին եւ ջանում էր միավորել բաժանված ընտանիքները: Դպրոցական Լյուք Բոյդենը հիշեցնում է, որ դա շատ վտանգավոր էր, քանի որ օսմանյան կառավարությունն այդ ժամանակ ամեն տեղ որոնում էր հայերին:
Ցեղասպանության փաստի ուսումնասիրությունից բացի, աշակերտները նաեւ հարցազրույց են վարել ցեղասպանագետ Ռիչարդ Հովհաննիսյանի եւ Սառա Քոենի հետ:
Ֆիլմի համար հեղինակները 7.5 հազար դոլար մրցանակ են ստացել: Նրանք նաեւ հնարավորություն են ստացել էմմա Քուշմանի գերեզմանաքարի վրա փորագրություն թողնել: Նրանք որոշել են տապանաքարի վրա փորագրել «էմմա Դարլինգ Քուշման. լույս մթության մեջ» (“Emma Darling Cushman: A Light in the Darkness”):